Բավականին հաջող ցուցակ կկարողանանք կազմել

«Համախմբում» կուսակցության առաջնորդ Վարդան Օսկանյանն այսօր լրագրողների հետ զրույցում դժվարացել է ասել, թե ինչ տեսք կունենա իր եւ պաշտպանության նախկին նախարար Սեյրան Օհանյանի դաշինքը: Նրա խոսքով՝ դժվար է այս պահին ասել, թե «Օհանյան-Օսկանյան» դաշինքն ինչպիսի վերջնական տեսք կունենա: «Դաշինքն անուն կունենա, որը կորոշվի ընդհանուր հավաքի արդյունքում:Դեռ ժամանակ ունենք, կարծում եմ՝ ճիշտ ժամանակին մեր ցուցակը կլինի: Երբ հավանական քաղաքական ուժերը դաշինքին միանալու վերջնական որոշում կայացնեն, վստահ եմ՝ բավականին հաջող ցուցակ կկարողանանք կազմել»,-ասաց նա: Այնուհետև, անդրադառնալով իրենց դաշինքին միացած ԱԻՄ առաջնորդ Պարույր Հայրիկյանի այն հայտարարությանը, որ հնարավոր է նա լքի դաշինքը, նշեց, որ ամեն մեկն ինքն է որոշում ինչ անել: «Ամեն մեկն իր քաղաքական խնդիրներն է դնելու, եւ քաղաքական ուժերը նաեւ ելնելով ցուցակի կազմից՝ վերջնական որոշում կկայացնեն՝ մնա՞լ դաշինքում, թե՞ չմնալ: Եկող մի քանի օրվա ընթացքում ամեն ինչ պարզ կլինի: Այս պահին դժվար է ասել՝ ինչպիսի վերջնական տեսք կունենա դաշինքը»,- ասաց նա: