Ժառանգությունում կրկին ոչինչ չեն որոշել,Փոստանջյանը դեմ էր
Ժառանգություն կուսակցությունն այսօր էլ չհստակեցրեց ընտրություններին մասնակցելու ձեւաչափը,չնայած նիստը բավականին երկար՝երեք ժամ էր տևել :«Ժառանգության» պատգամավոր Զարուհի Փոստանջյանը հրաժարվեց մեկնաբանություն տալ, միայն ասաց, որ հարցերին կպատասխանի Ժառանգության փոխնախագահ Արմեն Մարտիրոսյանը: Արմեն Մարտիրոսյանը լրագրողներին հայտնեց, որ խորհուրդը որոշում է կայացրել՝ մասնակցել դաշինքով, բայց դեռ չեն հստակեցրել՝ որ դաշինքով. «Որևէ խնդիր չկա, ոչ միայն Փոստանջյանը, այլ անձինք էլ կան, որոնք միանձնյա մասնակցելուն են կողմ։ Քվեարկություն է եղել, և խորհուրդը որոշել է, որ դաշինքով ենք մասնակցելու» ։ Նա նշեց, որ Ժառանգության անդամ Զարուհի Փոստանջյանը և այլ անդամներ դեմ են եղել ընտրություններին դաշինքով մասնակցությանը, բայց խորհրդի անդամների ճնշող մեծամասնությունը դաշինքի կողմնակից է եղել: Եվ քվեարկության արդյունքում ընտրվել է այս տարբերակը: Արմեն Մարտիրոսյանն ասաց, որ Ծառուկյանի դաշինքի հետ կապված պաշտոնական որևէ հարաբերություն այլևս չկա, այս պահին այն դուրս է եկել իրենց օրակարգից։ «Կուսակցության խորհուրդը որոշել է երկու դաշինքի՝ Սեյրան Օհանյանի և «Ելք»-ի հետ բանակցել»,-նշեց Արմեն Մարտիրոսյանը։ Րաֆֆի Հովհաննիսյանի առաջադրվելու մասով էլ դեռ հստակ ոչինչ չկա,բայց Արմեն Մարտիրոսյանը կարծում է,որ կառաջադրվի:
Հետևեք մեզ Viber-ում
