Թուրքիայի հայ համայնքը հոգևորականների պակաս ունի. «Ակօս»
Ստամբուլի հայկական պարբերականներից «Ակօսը» գրում է,որ Թուրքիայի հայ համայնքը հոգևորականների խիստ պակաս ունի, խնդիրը վերջին տարիներին օրակարգային է ու մտահոգիչ:Պոլսո Հայոց պատրիարքարանը Թուրքիայի տարածքում չունի առանձին հոգևոր դպրոց, որտեղ կկարողանար կրթել երիտասարդ հոգևորականների՝ եկեղեցուն և համայնքին ծառայելու համար,հիշեցնում է պարբերականը: Հոգևորական դառնալու պատրաստակամություն հայտնած երիտասարդները հոգևոր խորհրդի համաձայնությունը ստանալուց հետո մեկնում են Էջմիածին, Բեյրութ կամ Երուսաղեմ, որտեղի ճեմարաններում էլ ստանում են համապատասխան կրթություն: «Սեփական հոգևոր դպրոց չունենալը մեծ բացթողումներ և խնդիրներ է առաջացնում: Ճեմարանականներին արտասահման ուղարկելն էլ համապատասխան խնդիրների առաջ է կանգնեցնում համայնքին: Ընկերներից, ընտանիքից, շրջապատից տարիներով կտրվելը հեշտ բան չէ, և ամեն մեկը դրան չի գնա: Իհարկե, հարցի նյութական կողմն էլ կա: Այդ իսկ պատճառով հոգևորական դառնալու պատրաստակամություն հայտնողների թիվը բավարար չէ», - «Ակօսի» հետ զրույցում հայտնել է վանահայր Զաքեոս Օհանյանը:
Հետևեք մեզ Viber-ում
