Դավաճանական գործարք` ռուսների խայտառակ անտարբերությամբ

Ռուսաստանի արտգործնախարար Սերգեյ Լավրովը դեմ է արտահայտվել, որպեսզի Մինսկում ձերբակալված բլոգեր Ալեքսանդր Լապշինն արտահանձնվի Ադրբեջան: Այս մասին նա երեկ ասել է մամլո ասուլիսում․ «Մենք դեմ ենք լրագրողների կողմից այս կամ այն տարածք այցելելը քրեականացնելուն: Մենք դեմ ենք, որպեսզի արտահանձնեն ՌԴ քաղաքացուն»: Հիշեցնենք, ռուս բլոգեր Ալեքսանդր Լապշինը, որն ունի Իսրայելի և Ռուսաստանի քաղաքացիություն, ձերբակալվել է դեկտեմբերի 15-ին Մինսկում՝ Ադրբեջանի իշխանությունների պահանջով: Ադրբեջանը Լապշինին մեղադրում է Ադրբեջանի «պետական սահմանն անօրինական կերպով հատելու» (Լեռնային Ղարաբաղ այցելելու) մեջ և պահանջում Բելառուսից նրան արտահանձնել: Ռուսաստանի արտգործնախարարը նշել է, որ իրենք Բելառուսի հետ մեկ միութենական պետության մեջ են, ինչը ենթադրում է «միասնական վիզային և միգրացիոն տարածություն, ինչպես նաև ցանկալի և անցանկալի անձանց միասնական ցուցակներ, արտահանձնման ոլորտում միասնական քաղաքականություն»: Լավրովը նաև հայտնել է, որ ռուս դիվանագետները մշտական կապի մեջ են եղել Լապշինի հետ, բլոգերի հետ հանդիպել են նաև իսրայելցի դիվանագետները: «Մենք աշխատում ենք՝ իսրայելցիների հետ ամուր կապ պահելով»,- ասել է Լավրովը՝ վստահեցնելով, որ կձեռնարկվեն բոլոր անհրաժեշտ միջոցները՝ իրավիճակը հարթելու համար: Պաշտոնական Բաքուն պատասխանել է Լավրովի հայտարարությանը: Անդրադառնալով Մինսկում Ադրբեջանի պահանջով ձերբակալված ռուս բլոգեր Ալեքսանդր Լապշինի արտահանձնման վերաբերյալ Լավրովի մեկնաբանությանը՝ Մամեդյարովը նշել է, որ այդ հարցը քննարկվում է «բացառապես իրավական հարթության մեջ»: «Ռուսաստանի նկատմամբ նման գործողություններ կատարած և անօրինական կերպով նրա պետական սահմանը հատած անձի նկատմամբ ՌԴ իրավապահ մարմինները նույնպիսի քայլեր կձեռնարկեին»: Ղարաբաղ այցելած, Ղարաբաղի ժողովրդի ու Արցախի մասին դրական լույսի ներքո նյութեր գրող, Ալիևին քննադատող Ալեքսանդր Լապշինի նկատմամբ Բելառուսի արարքն, իհարկե, անսպասելի չէ: Լուկաշենկոն Ալիևից շքանշաններ էր ստացավ` այդ ձերբակալությունից օրեր առաջ: Բայց ի՞նչ մտածել Հայաստանի ռազմավարական դաշնակից Ռուսաստանի մասին, որի քաղաքացին է Լապշինը: Ինչպե՞ս կվարվեր Ռուսաստանը, եթե մի երրորդ երկիր Ռուսաստանի քաղաքացուն, օրինակ` ԱՄՆ-ի պահանջով ձերբակալեր, ապա` պահանջներ արտահանձնել ԱՄՆ... Կարելի է պատկերացնել, թե ինչ կկատարվեր. Ռուսաստանի մամուլը օր ու գիշեր կլծվեր ԱՄՆ-ին ու այդ երրորդ երկրին անարգանքի սյունին գամելու գործընթացին` 24-ժամյա ռեժիմով թույլ թափելով: Բայց այլ է իրավիճակը, երբ Ռուսաստանի ռազմավարական գործընկեր Իլհամ Ալիևն է «գործի մեջ»: Ադրբեջանի դատախազությունն արդեն շաբաթներ առաջ է պաշտոնապես արտահանձնման պահանջ ներկայացրել: «Մինսկում, սակայն, ուզում են, որ Լապշինը կամավոր ստորագրի այդ փաստաթղթի տակ, ինչը նրան հետագայում կզրկի որոշումը բողոքարկելու իրավունքից», - իսրայելական «Հաարեց»-ին պատմել է բլոգերի կինը՝ Եկատերինա Կոպիլովան: «Ադրբեջանի արտգործնախարարության բարձրաստիճան պաշտոնյաները իսրայելցի դիվանագետներին ասել են, թե պաշտոնական Բաքուն մտադիր չէ հրաժարվել արտահանձնման պահանջից, և հիմա Երուսաղեմում մտավախություն ունեն, որ բլոգերը կարող է Ադրբեջան տեղափոխվել արդեն առաջիկա օրերին», - գրում է իսրայելական պարբերականը: Առայժմ արդյունք չեն տալիս նաև միջազգային կազմակերպությունների ջանքերը: Օրեր առաջ, մասնավորապես, Նյու Յորքում գործող Լրագրողների պաշտպանության կոմիտեն կոչ է արել Բելառուսի իշխանություններին՝ անհապաղ ազատ արձակել բլոգերին, ընդգծելով, որ «Լապշինը չպետք է կալանավորվի իր կարծիքն արտահայտելու կամ վիճահարույց տարածաշրջան այցելելու համար»: Հեղինակավոր կազմակերպության տվյալներով՝ Ադրբեջանը Ղարաբաղ այցելելու համար 180 լրագրողի է ներառել իր «սև ցուցակում»: Ավելի վաղ իսրայելցի դիվանագետները նշել էին, որ Բաքուն փորձում է Լապշինի ազատազրկումը նախադեպ դարձնել՝ մյուսներին ճնշելու համար: Իսկ ո՞ւր մնաց մամուլի ազատությունը, լրագրողական գործունեության ազատությունը… Մոսկվան ոչինչ չունի՞ ասելու: Թե՞ իսկապես համարում են, որ Լապշինն ապօրինի «Ադրբեջանի տարածք» է ներխուժել... Կամ ի՞նչ է նշանակում` Ռուսաստանի արտգործնախարար Սերգեյ Լավրովը դեմ է արտահայտվել, որպեսզի Մինսկում ձերբակալված բլոգեր Ալեքսանդր Լապշինն արտահանձնվի Ադրբեջան: Իսկ ի՞նչ քայլեր են իրականացվում, կամ` իրականացվո՞ւմ են արդյոք... Լապշինի նկատմամբ իրականացվում է դավաճանական գործարք` Ռուսաստանի մասնակցությամբ, այլապես Մոսկվան վաղուց արդեն Բելառուսի իրավապահների հետ լուծած կլիներ Լապշինի հարցը և կհասներ նրան, որպեսզի նա վերադառնար Ռուսաստան: Բայց սա չի արվում` հերթական անգամ ապացուցելով ռուս-ադրբեջանական ամուր ու ջերմ հարաբերությունները: Մետաքսյա Շալունց