Հայտնաբերվել է զենքը, որով Կիեւում կրակել են Մայդանի ակտիվիստների վրա

Հայտնաբերվել է զենքը, որով  2014թ. ձմռանը Կիեւում կրակել էին Մայդանի ակտիվիստների վրա: Այս մասին Ուկրաինայի նախագահ Պյոտր Պորոշենկոյին զեկուցել է Անվտանգության խորհրդի ղեկավար Վասիլի Գրիցակը, ասված է Ուկրաինայի նախագահի պաշտոնական կայքում: Գրիցակի խոսքով՝ հետաքննության ընթացքում հայտնաբերվել է 23 միավոր հրազեն, որոնք վնասված են եղել մեխանիկական ճանապարհով: Նրանց վրայից սղոցված են եղել նույնականացման համարները: Փորձաքննության ընթացքում նույնականացվել է 12 միավոր զենք: Դրանց թվում՝ Կալաշնիկովի ինքնաձիգեր եւ գնդացիր, ինչպես նաեւ 12 մմ տրամաչափով որսորդական հարթափող զենք: Ինչպես նշել է Պորոշենկոն, այժմ հնարավոր կլինի պարզել, թե ում հրամանով է այդ զենքը տրվել սպանությունների պատվիրատուներին եւ կազմակերպիչներին: Ուկրաինայի Առողջապահության  նախարարության տվյալներով 2013թ. նոյեմբերի 30-ից 2014թ. ապրիլը Կիեւում բախումների հետեւանքով զոհվել է 106 մարդ: Նրանց մեծ մասը դիպուկահարների զոհ է դարձել: