Ստամբուլի օդանավակայաններում չվերթներ են չեղարկվել

Հունվարի 7-ին թուրքական Turkish Airlines ավիաընկերությունը հայտնել է ձյան տեսքով առատ տեղումների պատճառով Ստամբուլի Աթաթուրքի անվան օդանավակայանում 610 չվերթի չեղարկման մասին, հաղորդում է РИА Новости-ն: Հաղորդվում է, որ կապված չվերթների չեղարկման հետ՝ 5900 ավիաուղևորներ տեղաբաշխվել են հյուրանոցներում։ Մոտ 20 հազար ուղևորների Աթաթուրքի օդանավակայանում ապահովվել են սննդով։ Սաբիհի Գյոքչենի անվան միջազգային օդանավակայանում էլ չեղարկվել է Pegasus Airlines-ի 192 չվերթ։ Anadolu գործակալության հաղորդմամբ` ձյան տեսքով առատ տեղումները Ստամբուլում բացասաբար են ազդում քաղաքի միլիոնավոր բնակիչների կյանքի վրա: Որոշ թաղամասերում ձյան շերտի բարձրությունը գերազանցել է 40 սանտիմետրը: