Տեղը չեք բերո՞ւմ

Մշակվում են պատգամավոր դառնալ ցանկացողների լեզվական մակարդակը ստուգող թեստեր: Այս մասին հայտարարարել է ՀՀ կրթության և գիտության նախարարության Լեզվի պետական տեսչության պետ Սերգո Երիցյանը:Իհարկե, շատերը մոռացել էին այս տեսչության մասին, որի գոյությունը ի չիք է դարձել երկրում մոլեգնող օտարալեզու պաստառներ ու վահանակների առատության տակ, սակայն խնդրո առարկան այստեղ տեսչությունը չէ, այլ հայրենի օրենսդիրները, որոնք անհերքելիորեն մայրենիի հետ կապված լուրջ խնդիրներ ունեն: «Օրենսդրորեն պատգամավորների համար սահմանված են լեզվական պահանջներ: Այս օրերին մենք կազմում ենք այն թեստերը, որոնք նախատեսված են հենց պատգամավոր դառնալ ցանկացողների համար: Նոր խորհրդարանի այն պատգամավորներն, ովքեր Հայաստանում հայերենով ամբողջական միջնակարգ կրթություն չեն ստացել, ստիպված կլինեն թեկնածությունը գրանցելուց առաջ հանձնել այդ թեստը: Ի դեպ, այս թեստերը ավարտական քննությունների մակարդակի են»,- մանրամասնել է Սերգո Երիցյանը: Նոր Ընտրական օրենսգրքի դեռեւս քննարկման ժամանակ շատերի մոտ կար տպավորություն, որ այն բազմաթիվ պատգամավորների համար կարող է հաջորդ գումարման խորհրդարան մուտքի սպառնալիք լինել: Օրենսգրքով պատգամավորի վերաբերյալ հոդվածը սահմանում է. «Ազգային ժողովի պատգամավոր կարող է ընտրվել քսանհինգ տարին լրացած, վերջին չորս տարում միայն Հայաստանի Հանրապետության քաղաքացի հանդիսացող, վերջին չորս տարում Հայաստանի Հանրապետությունում մշտապես բնակվող, ընտրական իրավունք ունեցող եւ հայերենին տիրապետող յուրաքանչյուր ոք»: Հայերենին տիրապետել է համարվում հայերենով միջնակարգ կամ բարձրագույն կրթություն ստացած լինելը: Դա էլ ստուգվում է կրթության եւ գիտության նախարարության սահմանած կարգով: Առաջին հայացքից տպավորություն է, թե այս հոդվածը հատուկ որոշ պատգամավորների դեմ է: Դրույթը Սահմանադրությամբ եւս ամրագրված է,ընդ որում՝ նախագահից եւս պահանջվում է հայերեն իմանալ: Անշուշտ ներկայիս խորհրդարանի կեսից ավելի պատգամավորների հայերենը շատերիս համար անհասկանալի մի լեզու է, այն փողոցի մակարդակից այն կողմ չի անցնում, սակայն փաստորեն այլնի մասին են խոսում ու կարելի է կռահել, թե Սերգո Երիցյանի հայտարարությանը այդ կալիբրի կարկառունները կարձագանքեն.<<Տեղը չեք բերո՞ւմ>>, սա մեղմ ասած: Քանզի Սերգո Երիցյանը եւ մեր պառլամենտարիզմի ջատագովներրը հավանաբար մոռացել են, որ մեր բոլոր օրենսդիրները, օլիգարխները, պաշտոնյաները ոչ միայն միջնակարգ կրթության ատեստատ ունեն, այլև յուրաքանչյուրը նվազագույնը մի քանի համալսարանի, ակադեմիայի դիպլոմ է պահում տանը, գիտությունների դոկտորի գիտական աստիճանների մասին էլ չխոսենք, Լիսկան վկա: Համաձայն այդ փաստաթղթերի՝ կարող են առանց վարանելու քննություն ընդունել Երիցյան Սերգոյից: Արդար անցնելու պարագայում այսօրվա խորհրդարանականներից շատերը , անկասկած, կզրկվեին պատգամավոր դառնալու հնարավորությունից: Բայց կա՞ մեկը, որ կհավատա, թե թեստեր հանձնելու քննությունն արդար կանցնի: Ընդհանրապես ՀՀ-ում բարձր պետական պաշտոններում սկզբունքային ոչ մի նշանակություն չունի, թե ինչ կրթություն ունի այն զբաղեցնողը։ Անկախ նրանից, կրթությամբ բանասեր ես դու, թե մաթեմատիկոս, իրավաբան, թե տնտեսագետ, դա դեռ ոչ մի բան չի նշանակում: Այնպես որ բարձրագույն կրթությունն ու կոնկրետ մասնագիտացումը բարձր պետական պաշտոններ զբաղեցնելու հարցում երկրորդական ու երրորդական են: Անի Սահակյան