Հռոմի պապը սուրբծննդյան ուղերձում խաղաղության կոչ է արել

Հռոմի պապ Ֆրանցիսկոսը Վատիկանում երեկ երեկոյան սուրբծննդյան պատարագ է մատուցել, հայտնում է Reuters-ը: Հռոմի պապ Ֆրանցիսկոսը, ելույթ ունենալով Վատիկանում ավանդական սուրբծննդյան Urbi et Orbi («Քաղաքին և աշխարհին») ուղերձով, կոչ է արել մերձավորարևելյան հակամարտության կողմերին բացել պատմության նոր էջ, որում ատելության զգացումն ու վրեժի ցանկությունը կփոխարինվեն միասին փոխըմբռնման ու ներդաշնակ ապագա կառուցելու ձգտմամբ։ Նա իր խոսքում հիշատակել է մարդկանց, որոնք տառապում են սովից, ներգաղթյալներին, որոնք ստիպված են բախվել բազմաթիվ դժվարությունների Եվրոպա տանող ճանապարհին, ինչպես նաև նրանց, որոնք ստիպված են եղել անցնել այնպիսի քաղաքների ռմբակոծման միջով, ինչպիսին է Սիրիայի Հալեպ քաղաքը: Ելույթ ունենալով Սուրբ Պետրոսի բազիլիկայի պատշգամբից՝ Ֆրանցիսկոս պապը խաղաղության կոչ է արել Իրաքում, Լիբիայում և Եմենում, որտեղ նրա խոսքով՝ մարդիկ դարձել են պատերազմների ու ահաբեկչության զոհը, ինչպես նաև հույս հայտնել, որ հակամարտություններն Աֆրիկայում, այդ թվում Նիգերիայում և Հարավային Սուդանում, շուտով կավարտվեն։