Քադիրովը դաժանորեն քննադատել է New York Daily News-ի հոդվածը Կառլովի սպանության մասին

Չեչնիայի նախագահ Ռամզան Քադիրովը վստահ է, որ New York Daily News թերթի հոդվածը արդարացնում և ողջունում է Թուրքիայում Ռուսաստանի դեսպան Անդրեյ Կառլովի սպանությունը: Ռուսաստանի ԱԳՆ պաշտոնական ներկայացուցիչ Մարիա Զախառովան, ավելի վաղ հայտնել էր, որ New York Daily News-ին նամակ կուղարկվի՝ պահանջով, որ ներողություն խնդրեն այն հոդվաի համար, որտեղ Կառլովի սպանությունը արդար են համարել և արդարացրել են ահաբեկչի գործողությունները: Թերթի մեկնաբան Գերշ Կունտցմանը հրաժարվել է ներողություն խնդրելուց: «New York Daily News ամերիկական թերթը հրապարակել է մի նյութ, որտեղ հերոսացվում է մարդասպանը, որտեղ արդարացնում ու ողջունում են Անդրեյ Կառլովի սպանությունը»,- գրել է Քադիրովը Instagram-ի իր էջում:   «Այդ ամենից հետո թերթի պատասխանատուներն իրենց մեղավոր չեն ճանաչում: Դա ստորություն է, մարդկային վշտին ցավակցելու տարրական նշանների բացակայություն, ահաբեկչությանը հանրային աջակցություն»,- ավելացրել է Չեչնիայի նախագահը: Քադիրովը նշել է, որ Ռուսաստանի և ողջ աշխարհի մուսուլմանները վշտացած են Անդրեյ Կառլովի սպանության կապակցությամբ, իսկ «նրանք, ովքեր կապ ունեն այդ սպանության հետ, ոչ թե կապ չունեն իսլամի հետ, այլև համարվում են նրա ոխերիմ թշնամիները»: