Թրամփի հաղթանակը հաստատվեց (տեսանյութ)

Երկուշաբթի Միացյալ Նահանգներում ավարտվեց նախագահական ընտրությունների եւս մեկ փուլ՝ ընտրական կոլեգիայի անդամները, հավաքվելով իրենց նահանգային մայրաքաղաքներում, նախագահ ընտրեցին Դոնալդ Թրամփին: Ավելի վաղ, նոյեմբերի 8-ին ԱՄՆ-ի յուրաքանչյուր նահանգում անցած ընտրությունների ընթացքում քաղաքացիները քվեարկել էին նախագահի թեկնածուների օգտին: Ընտրական կոլեգիան կոչված է վավերացնել քաղաքացիների ընտրությունը: Ընտրություններում պարտված դեմոկրատ Հիլարի Քլինթոնի թեկնածուները սակայն հորդորում էին ընտրական կոլեգիայի անդամներին խախտելով քաղաքացիների որոշումը հրաժարվել ընտրել Դոնալդ Թրամփին: «Սա այս երկրի փրկության վերջին հնարավորությունն է», – ասում է Փենսիլվանիայում բողոքի ցույցի դուրս եկած Էլզա Լանքֆորտը: Բանն այն է, ԱՄՆ-ի որոշ նահանգներում ընտրական կոլեգիայի անդամները ազատ են քվեն տալ ցանկացած թեկնածուի: Այսպես, եթե շուրջ երեք տասնյակ նահանգներում կոլեգիայի անդամների քվեն ուղղակիորեն կախված է նահանգի բնակչության մեծամասնության քվեից, ապա մյուս նահանգներում քվեն այլ թեկնածուին տալու համար կոլեգիայի անդամներին կամ հասնում է տուգանք 1,000 դոլարի չափով, կամ էլ՝ ոչ մի պատիժ չի հասնում: Սակայն, ընտրական կոլեգիայի բազմաթիվ անդամների խոսքով, քաղաքացիների քվեի համաձայն ընտրելը ոչ միայն օրենսդրական այլեւ՝ բարոյական հարց է, ուստի ցուցարարների պահանջներն անհիմն են. «Դրանք բացահայտում են ժողովրդավարության թերի գիտակցում, ինչպես նաեւ՝ անարգանք», – նշում է Հյուսիսային Քարոլինայի ընտրական կոլեգիայի քարտուղար Գլեն Փինքնին: Քլինթոնի կողմնակիցները պնդում էին, որ Հիլարի Քլինթոնին աջակցություն են հայտնել ավելի մեծ թվով քաղաքացիներ եւ հիշատակում հատուկ ծառայությունների հաղորդագրությունները՝ Դեմոկրատական կուսակցության դեմ ուղղված ռուսական հաքերների գրոհների վերաբերյալ: Դոնալդ Թրամփի երդման պաշտոնական արարողությունը տեղի է ունենալու հունվարի 20-ին: