Ռեստորանս ու ճոխ ծախսերս գաղտնի թող մնան
Գաղտնի են պահելու, թե որքան են Այսօր ԱԺ նիստում քվեարկության դրվեց կառավարության կողմից ներկայացված Գնումների մասին օրենքի խնդրահարույց նախագիծը: Նախագիծն ընդունվեց 77 կողմ, 2 դեմ, 22 ձեռնպահ ձայներով: Այն խնդրահարույց է այն առումով, գաղտնիացվում են ՀՀ նախագահի, Ազգային ժողովի նախագահի և վարչապետի արարողակարգային ծախսերը: Այս անհեթեթությունը մեկնաբանվում է անվտամնգության նկատառումներով, սակայն անհասկանալի է, թե ինչպե՞ ս կարող է երկրի առաջին դեմքերի ծախսերի հրապարակումն ազդել նրանց անվտանգության վրա: Ասենք ինչ վտանգ կարող է սպառնալ, երբ մենք տեղեկանանք, թե նախագահականում որեւէ միջոցառման համար որքան գումար է ծախսվել, կամ ԱԺ նախագահի ծառայողական մեքենայի համար՝ քանի լիտր բենզին եւ այլն։ Եթե հարցը վերաբերեր օրինակ, թե որտեղ են ճաշում, կամ հանգստանում բարձրաստիճան պաշտոնատար անձինք, գուցե կարելի էր համաձայնել նախագծի հեղինակների հիմնավորման հետ։ Բայց խոսքը տվյալ դեպքում ծախսերի մասին է, իսկ այստեղ անվտանգության խնդիր փնտրելու համար անռվազն պետք է իշխանություն լինել։ Իրականում պարզ է, որ գաղտնիացմամբ մեկ նպատակ է հետապնդում, հանրությունից թաքցնել այն աստղաբաշխական, մարդկային երեւակայության մեջ չտեղավորվող ծախսերը, որոնք արվում են նշված գերատեսչություններում։ ՀԱԿ խմբակցության քարտուղար Արամ Մանուկյանը ճշտեց. «Օրենքների արագ բերելու արդյունքում երբեմն չենք հասցնում ամբողջական ծանոթանալ: Մամուլում հրապարակումներ եղան, որ այս օրենքի համաձայն՝ ԱԺ նախագահի, վարչապետի եւ նախագահի ծախսերը դառնում են պետական գաղտնիք եւ այլեւս չեն լինելու թափանցիկ: Եթե մենք սխալ ենք հասկացել, խնդրում եմ որեւէ մեկը ճշտի, որովհետեւ դրանից է կախված մեր քվեարկությունը»: ԱԺ նախագահ Գալուստ Սահակյանն էլ տեղյակ չէր, որ իր ծախսերը գաղտնի են դառնալու: Նա արձագանքեց. «Ճիշտն ասած, ես դրանից տեղեկություններ չունեմ, այսօր թերթում եմ կարդացել: Նման բան, կարծում եմ, ԱԺ-ի համար չկա ու չկա»: ՀՀԿ պատգամավոր Վարդան Այվազյանը լուսավորեց․ «Խոսքը վերաբերում է միայն արարողակարգի գնումներին: Արարողակարգի գնումները իրականացվում են փակ մասով: Եթե մամուլին հավատում եք, օրենքներին էլ հավատացեք: Մոտ 1 ամսից ավելի է՝ էդ օրենքը կա, արդեն 3-րդ ընթերցում է գնում», ասաց նա հավելյալ պարզաբանելով․ «Զուտ արարողակարգինն է՝ որ ռեստորանում պետք է հաց ուտեն, երեք մարմինների համար փակ է»: Մինչդեռ հասկանալի է, որ իշխանությունը օրենքի հետ վարվելու է իր շահերից ելնելով եւ միայն «հաց ուտելու» տեղի մասին չէ գաղտնի պահվելու՝ որպես անվտանգության սպառնալիք։ Գալուստ Սահակյանն էլ Արամ Մանուկյանին վստահեցրեց, որ եթե հետագայում ռեստորանում հաց ուտի, տեղյակ կպահի իր արարողակարգի ծախսերից. «Այդտեղ որեւէ բան ես չեմ տեսնում»: Դահլիճում ծիծաղ առաջացավ։
Անի Սահակյան
Հետևեք մեզ Viber-ում
