Ասադի Ստալինգրադը
The Times պարբերականն անդրադարձել է Հալեպի իրավիճակին և գրել. Հալեպի անկումը կամրապնդի Ասադի վիճակը. Մոսկվայի և Թեհրանի օգնությամբ նա վերահսկում է Սիրիան՝ Լիբանանի հետ սահմանների մեծ մասը և Միջերկրական ծովի ափամերձ շրջանները ևս նրա իշխանության ներքո են։ Արևմտյան քաղաքականության կենտրոնական հիմնասյունը՝ Ասադին իշխանությունից հեռացնելու անհրաժեշտությունը և նրան չափավոր ընդդիմադիրներով փոխարինելը, անդառնալիորեն խարխլվել է։ Պատերազմը մոտենում է ավարտին, այդ պատճառով նախօրեին Հալեպի համար մարտը համեմատում են Ստալինգրադի հետ։ Ուժերի հավասարակշռությունը խարխլվում է : Հալեպում Ասադը հաղթանակն օգտագործում է, որպեսզի հարձակվի Իդլիբի վրա, որտեղ տեղափոխվել են ապստամբների մեծ մասը։ Հավանաբար Ռուսաստանը կօգնի նրան, քանի որ կարծում է, որ ապստամբները կհամագործակցեն «Ալ-Քաիդայի» հետ։ Արդյոք լավատեսության պատճառ կա՞ այս մռայլ լանդշաֆտում։ Ռազմական առանցքը, որն ապահովել է Հալեպի ոչնչացումը, շուտով կմասնատվի. չի կարելի ասել, որ Թեհրանի և Մոսկվայի ձգտումները կատարելապես համընկնում են։ Իրանը, մասնավորապես, պատրաստ է Սիրիայի տարանջատմանը, իսկ Ռուսաստանը շահագրգռված չէ դրանում։ Այս տարբերությունները պետք է օգտագործի ԱՄՆ նոր վարչակազմը։ Միացյալ Նահանգները պետք է կոշտ պատժամիջոցներ սահմանի Իրանական հեղափոխական գվարդիայի հետ կապ ունեցողների դեմ՝ կարծում է հոդվածագիրը։
Հետևեք մեզ Viber-ում
