Խախտվել է պայմանավորվածությունը

Հալեպի արևելքում զինված կազմավորումների պարագլուխները խախտել են քաղաքից իրենց դուրս բերելու վերաբերյալ սիրիական իշխանությունների հետ ձեռք բերված պայմանավորվածությունը և առավոտյան վերսկսել են մարտական գործողությունները: ТАСС-ի հաղորդմամբ՝ օգտվելով զինադադարից՝ լուսաբացին զինյալները վերախմբավորվել են և վերսկսել մարտական գործողությունները՝ փորձելով սիրիական զորքերի դիրքերը ճեղքել հյուսիսարեւմտյան ուղղությամբ: Ասադի զինվորները հետ են մղել հարձակումն ու շարունակել ազատել արևելյան Հալեպի թաղամասերը ապստամբներից։ Վերջին օրերին զինյալների վերահսկողության տակ գտնվող շրջանները լքել է 6 հազար խաղաղ բնակիչ։ «Հալեպի արևելյան շրջաններում զինված կազմավորումների պարագլուխների հետ սիրիական իշխանությունների ներկայացուցիչների պայմանավորվածություններին համապատասխան, հակամարտող կողմերի հաշտեցման ռուսական կենտրոնի կողմից նախապատրաստվել էր քաղաքից զինյալների դուրսբերումը Իդլիբի ուղղությամբ: Պլանավորվում էր զինյալներին ավտոբուսներով Սալահ Էդ Դին թաղամասի միջանցքով դուրս բերել տեղական ժամանակով ժամը մոտավորապես 06:00-ին: Ավելի վաղ պայմանավորված վայր տրանսպորտի ժամանումից հետո զինյալներն սկսել են գնդակոծել ավտոշարասյունը»,-ասված է հաղորդագրության մեջ: