Ալիեւը չի վստահում
Ադրբեջանի նախագահ Իլհամ Ալիեւի հրամանագրով ստեղծվել է նախագահին կից Վճռաբեկ խորհուրդ:
Հրամանագրում ասվում է, որ խորհուրդը ստեղծվում է ձեռնարկատիրական ոլորտում գործադիր իշխանության կենտրոնական եւ տեղական մարմինների որոշումների, կամ նրանց անգործության վերաբերյալ վերադաս մարմիններին քաղաքացիների եւ կազմակերպությունների դիմումների քննարկումն ապահովելու համար:
Ինչպես հաղորդում է «Թուրան»-ը, նախագահի աշխատակազմին հանձնարարվել է անհրաժեշտ միջոցներ ձեռնարկել խորհրդի գործունեությունը կազմակերպելու գծով: «Թե կոնկրետ ինչով է զբաղվելու այդ նոր կառույցը, հայտնի չէ: Սակայն, դատելով ամենից, այդ մարմինը կոչված է քննել տարբեր պետական մարմինների գործողությունների վերաբերյալ քաղաքացիների դիմումները: Փաստորեն, խորհուրդը պետք է փոխարինի դատարաններին, չնայած խորհրդի լիազորություններն անհայտ են մնում: Օրինակ, հասկանալի չէ, ինչ է ձեռնարկվելու այս կամ այն խախտումների հայտնաբերման դեպքում», -նշում է գործխակալությունը: «Թուրանը» հաղորդում է, որ նման մարմնի ի հայտ գալը վկայում է այն մասին, որ Ադրբեջանում դատարանները չեն կատարում իրենց գործառույթները: «Միեւնույն ժամանակ պետության ղեկավարի մոտ վստահություն չկա ուժային գերատեսչությունների եւ այլ պետական մարմինների նկատմամբ, եթե նրանց նկատմամբ գանգատները պետք է քննի ուրիշ պետական մարմին», -ընդգծում է «Թուրան»-ը:
Հետևեք մեզ Viber-ում
