Ռուսաստանն ու Թուրքիան պետք է կատարեն վիթխարի աշխատանք

TASS լրատվական գործակալության փոխանցմամբ՝ Ռուսաստանն ու Թուրքիան կարող են տարեկան ապրանքաշրջանառության ծավալը հասցնել 100 միլիարդ դոլարի, սակայն դրա համար անհրաժեշտ են որոշակի քայլեր։ Այդ մասին Ռուսաստանի վարչապետ Դմիտրի Մեդվեդևի հետ հանդիպումից հետո լրագրողների հետ զրույցում հայտարարել է Թուրքիայի վարչապետ Բինալի Յըլդըրըմը։ Նրա խոսքերով՝ վերջին մեկ տարում նվազել է ապրանքաշրջանառության ծավալը, որը մինչ այդ հասցվել էր 36 միլիարդ դոլարի. «Մենք պետք է կատարենք վիթխարի աշխատանք։ Եվ ամեն դեպքում մեր կարծիքով՝ 100 միլիարդ դոլարը մեզ համար իրագործելի նպատակ է»։ Յըլդըրըմն այդ նպատակով կարևորել է Ռուսաստանի սահմանած պատժամիջոցների վերացումը, վիզային ռեժիմի վերացումը։ Նա ընդգծել է, որ Թուրքիան ռազմավարական ներդրման կարգավիճակ կշնորհի Աքքույուի ատոմակայանին։