Գիշերը քանակական առումով ավելի շատ կրակոցներ են եղել.Դավիթ Բաբայանը՝սահմանին տիրող իրավիճակի մասին

Լեռնային Ղարաբաղում գիշերը քանակական առումով ավելի շատ կրակոցներ են եղել, սակայն , իրավիճակի կտրուկ փոփոխություն չկա,մեզ հետ զրույցում նման տեսակետ հայտնեց ԼՂՀ նախագահ Բակո Սահակյանի մամուլի քարտուղար Դավիթ  Բաբայանը։ Դավիթ Բաբայանը ևս մեկ անգամ ցանկացավ նշել, որ սահմանին որևէ արտառոց բան տեղի չի ունենում. «Սահմանին որևէ արտառոց բան տեղի չի ունենում: Սա մեր առօրյան է, որը մի օր գուցե մի քիչ շատ լարված է, մի օր` մի քիչ քիչ: Իրավիճակն այսպիսին է, ինչպիսին եղել է 3 օր առաջ, 2 ամիս առաջ: Ունենք միևնույն աննորմալ թշնամին: Պետք չէ անիմաստ խառնաշփոթի մեջ ընկնել»: Խոսելով վիրավոր զինվորների մասին` Դավիթ Բաբայանը նշեց. «Վիրավոր տղաների կյանքին բարեբախտաբար վտանգ չի սպառնում, բժիշկներն անում են ամեն բան նրանց վիճակը լավացնելու համար: Տա Աստված՝ նրանք շուտ ապաքինվեն»: Հարցին, թե ինչու ԼՂՀ ՊԲ-ն չէր հաղորդում վիրավորների առկայության մասին ողջ օրվա ընթացքում, քանի դեռ  ֆեյսբուքյան օգտատերերի շրջանում լուրեր էին շրջանառվում այդ մասին, Դավիթ Բաբայանը պատասխանեց. «Հիմա, գիտեք ոնց է, բանակը և, առհասարակ, մյուս  կառույցներն ունեն իրենց քաղաքականությունը: Եվ պետք է ամեն բան ճշգրտված լինի, որպեսզի  տրամադրվի ինֆորմացիա:  ՊԲ լրատվական ծառայությունը ֆեյսբուքյան էջ չի՞, որ սենսացիայի հետևից  ընկած` ինչ ասես դնի»։