Կանադայում կալանավորված հային չորս մեղադրանք է առաջադրվել

Հային, որին Կանադայի ոստիկանությունը կալանավորել է օդանավում անզուսպ վարքագծի համար, չորս մեղադրանք է առաջադրվել: 35-ամյա Սիսակ Խուդավերդյանը կալանավորվել է Կանադայի հյուսիսում գտնվող Իկալիուտ քաղաքի օդանավակայանում օդանավի հարկադիր վայրէջքից անմիջապես հետո: Խուդավերդյանը մեղադրվում է այն բանի համար, որ սպառնալիքի տակ է դրել օդանավի եւ ուղեւորների անվտանգությունը, նաեւ հասարակական կարգն է խախտել, հայտնում է cbc.ca-ը: Տղամարդու գործով դատական նիստը տեղի է ունեցել նոյեմբերի 28-ին: Նրան հայերենի թարգամանիչ է տրամադրվել: Դատավորը Խուդավերդյանի նկատմամբ 60-օրյա հոգեբուժական հետազոտություն կատարելու որոշում է ընդունել՝ պարզելու համար, թե արդյոք նա մեղսունակ է կամ արդյոք չի տառապում հոգեկան խանգարմամբ, որը կարող է նրան քրեական պատասխանատվությունից ազատել: Հաջորդ նիստը նշանակված է 2017 թվականի հունվարի 31-ին: Նշենք, որ Խուդավերդյանը կալանավորվել է Մոսկվայից Լոս Անջելես թռչող ռուսական Aeroflot ընկերության օդանավի սրահում հրահրած դեբոշի համար: