Ձեզ ի՜նչ եղավ, տիկին Զոհրաբյան

ԲՀԿ խմբակցության ղեկավար Նաիրա Զոհրաբյանը չի հետևել ՀՀԿ 16-րդ համագումարին։ «Ես չեմ հետևել Հանրապետականի համագումարին։ Ինձ նրանց ելույթները չեն հետաքրքրում։ Չեմ պատրաստվում դրանք ընթերցել», - խորհրդարանում լրագրողների հետ զրույցում ասաց Նաիրա Զոհրաբյանը։ Պատգամավորը հրաժարվեց մեկնաբանել վարչապետի՝ հանրապետական դառնալու որոշումը և հավելեց, որ դա ևս իրեն չի հետաքրքրում։ Նաիրա Զոհրաբյանի պես բազմակի հետաքրքրություն դրսեւորող քաղաքական գործիչի համար, ինչ խոսք, շշմելու է նման հայտարարությունը։ Խնդիրն այստեղ, մանավանդ, վեր է անձնական հետաքրքրությունների շրջանակից, այլ իբրեւ քաղաքական դաշտում, ինչպես տիկին Զոհրաբյանն է հաճախ թմբկահարում՝ երկրորդ ազդեցիկ ուժի ղեկավար, պարզապես անթույլատրելի է անտարբերության մատնել կարեւորագույն միջոցառումներից մեկը, որպիսին ՀՀԿ համագումարն է։ Նախկին կառավարությունների նկատմամբ անթաքույց հետաքրքրություն ունեցող տիկին Զոհրաբյանին տեսնես ի՞նչ է պատահել, որ այսքան անտարբեր է դարձել, թե ՀՀԿ-ի, թե հատկապես Կարեն Կարապետյանի նկատմամբ։ Տիգրան Սարգսյանի ու նրա կառավարության բմբուլները քամուն տվող, հաջորդի նկատմամբ անհամեմատ խնայող վերաբերմունք ունեցող ԲՀԿ-ում, փաստորեն, բոլորովին անտաբեր են։ Սրա տակ կարելի է մի քանի պատճառահետեւանքային ենթաշերտեր տեսնել։ Կամ խանդի տեսարաններ են բեմադրվում այս կուսակցության կողմից, քանի որ ՀՀԿ-ն հրավիրել է անգամ Արտաշես Գեղամյանի կուսակցությանը, բայց ոչ ԲՀԿ-ին, որը նեղ պահերին կանգնում է իշխանության ու նրա նախաձեռնությունների կողքին, որի հնազանդ համաձայնությամբ կյանքի կոչվեց Սահմանադրության փոփոխությունը,Ընտրական օրենսգիրքը կյանքի կոչվեց, որը անամոթ բացատրություններով կողմ է քվարկում իշխանության համար կենաց-մահու նշանակություն ունեցող օրենքներին, ինքնազոհաբերման գնում հանուն իշխանությունների։ Կամ էլ ԲՀԿ-ն պատասխանատու որոշումից առաջ չի կարող անկանխատեսելի պահվածք դրսեւորել ու ոտատակ գցել իշխանություններին։ Որովհետեւ ՀՀԿ համագումարի արձագանքները առանց բացառության քննադատական են, այս կուսակցություն ըստ էության գովասանքի արժանի ոչինչ չարեց, որպեսզի հնարավոր լինի նկատել ու ողջունել։ Հիմա ընդդիմադիր դաշտի վերաձևման քողարկված պրոցեսներ են ընթանում, քաղաքական ուժերի միջեւ կոնսուլտացիաներ, որպեսզի 2017-ից առաջ դաշինքով մասնակցություն ապահովեն, դժվար չէ նկատել, որ ԲՀԿ-ն մի կողմ է քաշվել ու հավակնոտ հայտարարություններ է անում, թե միայն իր «քաշայինների» հետ դաշինք կկազմի ու ոչ մի կուսակցության բեռ չի անի իր ուսերին խորհրդարան տանի։ Սա ասում է մի կուսակցության ղեկավար, որից փշրանքներ են մնացել Գագիկ Ծառուկյանի հեռանալուց հետո, փակվել են տարածքային գրասենյակներ, բազմահազար կուսակցականներ հետևել Ծառուկյանի քայլին, իսկ Նաիրա Զոհրաբյանն իներցիայով թագավորում է ավերակների վրա, քանզի շատերն անտեղյակ են, որ Ծառուկյանը հեռացել է ԲՀԿ-ից։ Տիկին Զոհրաբյանի հույսը մարդկանց ենթագիտակցական մակարդակում չխամրող հուշերն են, իսկ իրականում քղաքականացված հանրույթը ու հատկապես իշխանությունը բոլորից լավ գիտեն ՀՀԿ-ի քաշը, որի ավելացում կլինի միայն Ծառուկյանի վերադարձի պարագայում։ Ամենայն հավանականությամբ այս պատճառով է, որ ԲՀԿ-ում չեն ցանկանում ռիսկի դիմել, վտանգի տակ դնել ապագա գործընթաներում իրենց լինելիության հարցը, ու չեն քննադատում իշխանություններին՝ հույսով, որ նորից կարժանանան նրանց ողորմածությանը, ապագա խորհրդարանում տեղ կզբաղեցնեն։ Անի Սահակյան