Կարեն Կարապետյանի ժամանակը սահմանափակ չէ

Շաբաթ օրը տեղի ունեցած ՀՀԿ համագումարի ժամանակ ՀՀԿ ղեկավար Սերժ Սարգսյանը հայտարարեց, որ եթե իր ղեկավարած կուսակցությունը հաջորդ տարի կայանալիք ընտրություններում ստանա մեծամասնություն, ապա Կարեն Կարապետյանը կշարունակի ղեկավարել գործադիր իշխանությունը: ԱԺ ՀԱԿ խմբակցության ղեկավար Լեւոն Զուրաբյան այսօր ԱԺ-ում լրագրողների հետ զրույցում անդրադառնալով Սերժ Սարգսյանի այս հայտարարությանը նշեց, թե Սարգսյանի կողմից կիրառվել է հնարք: «Ալ Ջազիրային տված հարցազրույցում Սերժ Սարգսյանն ասել է, որ իր վարչապետության հարցը կախված է հաջորդ տարի կայանալիք ընտրություններից հետո»,- ասաց Զուրաբյանը, հավելելով, որ Կարեն Կարապետյանի ֆիգուրը օգտագործվում է միայն խորհրդարանական ընտրություններում հաջողացնելու համար: Այս ամենը նկատի ունենալով Զուրաբյանը գտնում է, որ խորհրդարանական ընտրություններից մեկ տարի անց, երբ լրանում է Սերժ Սարգսյանի պաշտոնավարման ժամկետից հետո նա կդառնա վարչապետ: Լրագրողներից մեկի հարցին, թե երկու տարի անց այսինքն Կարեն Կաչապետյանը հետ կգնա Մոսկվա, Զուրաբյանն ասաց, որ այդ հարցերը պետք է ուղղել իրեն: Մեր հարցին, թե հավատում եք իշխանությունների այն հայտարարություններին, որ յոթ հազար քաղաքացի մեկ օրում որոշեց անդամակցել ՀՀԿ-ին, Զուրաբյանը տվեց հետեւյալ պատասխանը. «Դա ամենախայտառակ բանն է: Գիտեք, որ մասսայաբար ստիպել են ջրի, լույսի, գազի աշխատողներին ընդգրկվել կուսակցության մեջ: Ես ուղղակի զարմանում եմ, իհարկե ռեկլամը բանը հասկանում ենք, բայց միթե՞ նրանք այնքան են կտրված իրականությունից, որ չեն հասկանում, որ այն մարդկանց մոտ առաջացել է զզվանք ՀՀԿ-ի նկատմամբ»: Ինչ վերաբերում է դիտարկմանը, թե միգուցե հաճույքով են անդամակցել ՀՀԿ-ին, Զուրաբյանը նկատեց, թե կան մարդիկ, ովքեր բռնությունից հաճույք են ստանում, բայց դա ոչինչ չի նշանակում: Փայլակ Ֆահրադյան