Էրդողանը` Թուրքիայի հարցով բանաձևի մասին
Եվրախորհրդարանի պատգամավորների գալիք քվեարկությունը՝ Թուրքիայի հետ ԵՄ անդամակցության մասին բանակցությունների հնարավոր դադարեցման հետ կապված, Անկարայի համար որևէ նշանակություն չունի: DW.com-ի փոխանցմամբ` այս մասին նոյեմբերի 23-ին հայտարարել է երկրի նախագահ Ռեջեփ Թայիփ Էրդողանը: «Բացարձակապես միևնույնն է, թե ինչպիսին կլինի արդյունքը. այդ քվեարկությունը մեզ համար ոչինչ չի նշանակում», - շեշտել է Էրդողանը` ելույթ ունենալով Ստամբուլում կայացած Իսլամական պետությունների տնտեսական համաժողովի ժամանակ: «Միայն այն փաստը, որ Եվրախորհրդարանը մտադիր է քվեարկություն անցկացնել այդ հարցի շուրջ, վկայում է այն մասին, որ կառույցը աջակցում է ահաբեկչական կազմակերպություններին և նրանց կողմից է ելույթ ունենում», - աղբյուրը մեջբերում է Էրդողանի խոսքը: Թուրքիայի հետ հետագա բանակցությունների մասին բանաձևի քվեարկությունը Եվրախորհրդարանում կկայանա նոյեմբերի 24-ին: Անկարայի հետ բանակցությունների դադարեցմանը կողմ են արտահայտվել Եվրախորհրդարանի բոլոր խոշոր խմբակցությունների ներկայացուցիչները:
Հետևեք մեզ Viber-ում
