«Արդարացի՞ է, որ ես և Դուք նույնքան գումար հատկացնենք բանակին». Խաչատուր Քոքոբելյան

ԱԺ պատգամավոր Խաչատուր Քոքոբելյանը, դիմելով Պաշտպանության նախարար Վիգեն Սարգսյանին հարցրեց, արդարացի՞ է, որ ես և Դուք նույնքան գումար հատկացնենք բանակին, որքան իմ կամ Ձեր օգնականը։ Պատգամավորը խոսեց նաեւ հասարակության այն մտահոգությունների մասին, որ մտածում են, թե հապճեպությունը նշանակում է պատերազմի սկիզբ: «Որպես պաշտպանության նախարար այն կարծիքին եմ, որ այս երկրում 2 պաշտոնյա կա, որոնք ամեն օր պետք է մտածեն պատերազմի մասին՝ հանրապետության նախագահը եւ պաշտպանության նախարարը»,- ասաց Վիգեն Սարգսյանը, ապա շարունակեց. «Այս քաղաքականությունը չենք բերում, որ մտածենք, թե վաղը պատերազմ է սկսելու: Ընդունում ենք այս օրենքի նախագիծը, որովհետեւ յուրաքանչյուր օր մեր զավակները, կրտսեր եղբայրները մարտական ծառայություն են իրականացնում, եւ հակառակորդը խախտելով հրադադարի պայմանները պարբերաբար իրավիճակ է ստեղծում, երբ ունենք վիրավորներ ու զոհվածներ»: Ինչ վերաբերում է այն հարցին, որ ինքն ու օգնականը միեւնույն չափով են գումար փոխանցելու, նախարարը չհամաձայնեց, որ սոցիալական անարդարության հարց կա: «Դրանից շատ ավելի մեծ հարկեր եմ վճարում ամբողջ զամբյուղով, իսկ սա մեկ պարտադիր վճար է, այնպես որ սոցիալական անարդարության խնդիր չկա, հատկապես որ ես ու իմ շատ գործընկերներ պլանավորում ենք շատ ավելին վճարել»,- ասաց Սարգսյանը: