Կարեն Կարապետյանից ավելի չինովնիկ ֆերմերները

Ի՞նչ հիմք ունի հայ ֆերմերներին  բաժին հասած Կարեն Կարապետյանի թևավոր կշտամբանքը, թե նրանք իրենից ավելի չինովնիկ են: Վարչապետը ոչ թե հարց է հնչեցնում, այլ վստահ գիտե, որ խոշոր ֆերմերները ևս պատահական մարդիկ չեն, և կաշկանդված ու անազատ են ավելի, քան պետական չինովնիկները: Իսկ ովքե՞ր են համեմատաբար խոշոր տնտեսություն ունեցող կամ վարող այդ մարդիկ: Խոշոր ջերմոցատերերն, օրինակ, կամ համայնքների ղեկավարների մերձավոր շրջապատից են, կամ նախարար-փոխնախարարների, պատգամավորների ջերմոցային հսկա տնտեսությունների կառավարիչներն են ընդամենը: Իսկ թե ինչու է այդպես, մի պարզ հաշվարկ կա: Եթե գյուղացին ուզում է իր բակում ջերմոց կառուցել, պիտի տունը գրավ դնի և քառասուն հազար դոլարի չափ վարկ վերցնի, ձմռանը ջեռուցելու համար էլ մի քանի միլիոնի գազ սպառի: Սա` փոքր տնտեսության դեպքում: Այնպես որ, Երևանում ու  մարզերում  խոշոր ջեմոցային կամ անասնապահական տնտեսությունների տերերը նույն մարդիկ են, որոնց անուններն անգիր գիտենք: Էլ ինչպե՞ս կաշկանդված չլինեն, ուղղակի  պարտավոր են  հլու հնազանդ լինել, իսկ ընտրություններին ակտիվ լինել ու ձայն հավաքել, որպեսզի կարողանան մարզ մտած արտոնյալ վարկերից, անվճարունակների դիզվառելիքից օգտվել: Ավելին` տարիներով տասնյակից ավելի չգրանցված աշխատողներ պահել, միամիտ ռևիզորներին էլ հավատացնել, թե ֆերմերների հորքուր-մորքուրներեն են, եկել են մի օրով օգնելու: Այնպես որ, վարչապետ Կարապետյանը գիտե իր սուր խոսքի ներքին իմաստը: Համարյա նման այն սիտուացիային, երբ ընդհատակյա միլիոնատեր Կորեյկոն Բենդերից շա~տ հասկանալի ու բազմանշանակ հեռագիր է ստանում`Մտովի իրար հետ ենք: Իսկ վարչապետ Կարեն Կարապետյանի բոլոր խոսքերը հաշվարկված ու լավ մտածված են , անգամ այն խոսքերը, որոնք արտաբերելու համար պաուզա է տալիս, իբրև թե իմպրովիզ է անում, կամ բառ փնտրում: Օրինակ, երբ պրիմիտիվ գողություն որակեց պաշտոնյանների վարքագիծը, ասաց ամենաստույգ խոսքը; Մեր պաշտոնյանները սիրում էին խոսել ու պայքարել ին-որ հանելուկային կոռուպցիայի մասին, իսկ վարչապետը փորձեց հարցը պարզ  ձևակերպել թե այդ կոռուպցիան ձեր արած սովորական կաշառակերությունն է, պրիմիտիվ գողություն: Կարեն Կարապետյանը ամեն ինչ լավ է պատկերացնում: Եվ ճիշտ  խորհրդականներ ունի: Գայանե Մկրտչյան