Հենրիխ Մխիթարյանը՝ Հայաստանում ՅՈւՆԻՍԵՖ-ի բարի կամքի դեսպան
Հայաստանի ազգային հավաքականի և «Մանչեսթեր Յունայթեդի» կիսապաշտպան Հենրիխ Մխիթարյանը նշանակվել է Հայաստանում ՅՈՒՆԻՍԵՖ-ի բարի կամքի դեսպան: «Բարի կամքի դեսպաններն աշխարհում շատ կարևոր դեր են կատարել: Տարբեր ոլորտների ներկայացուցիչներն ամեն ինչ ներդրել են երեխաների կողքին լինելու համար: Մենք շատ շնորհակալ ենք Հենրիխին, ով համաձայնեց աշխատել երեխաների համար: Լինելով «Մանչեսթեր Յունայթեդի» ֆուտբոլիստ` նա արդեն իսկ օգնում է»,-Ֆուտբոլի ակադեմիայում կայացած միջոցառման ժամանակ ասաց ՅՈւՆԻՍԵՖ-ի հայաստանյան ներկայացուցիչ Տանյա Ռադոչայը: «Շնորհակալ եմ այս կարեւոր դերը ինձ հանձնելու համար: Վստահ եմ, որ ՅՈւՆԻՍԵՖ-ի հետ ավելի մեծ արդյունքների կհասնենք յուրաքանչյուր երեխայի իրավունքները պաշտպանելու գործում: ՅՈՒՆԻՍԵՖ-ի հետ իմ համագործակցության հենասյունը լինելու է կրթության ոլորտը: Կազմակերպության հետ միասին ես ակտիվ քայլեր եմ ձեռնարկելու, որպեսզի հավասար պայմաններ ստեղծվեն երեխաների ուսուցման համար», – պատասխան խոսքով հանդես եկավ Հենրիխ Մխիթարյանը:
Հետևեք մեզ Viber-ում
