Վերացնում են Տիգրան Սարգսյանի ստեղծածներին

Սեպտեմբերի 29-ին վարչապետ Կարեն Կարապետյանը սպորտի եւ երիտասարդության հարցերի, արտակարգ իրավիճակների, մշակույթի եւ քաղաքաշինության նախարարներին հանձնարարեց մեկշաբաթյա ժամկետում քննարկել իրենց ենթակայության տակ գտնվող ծրագրերի իրականացման գրասենյակների` ԾԻԳ-երի լուծարման հարցը եւ առաջարկություն ներկայացնել: Կառավարության նոյեմբերի 3-ի նիստում լուծարվել է երեք ԾԻԳ` «Արտակարգ իրավիճակների բնագավառում ծրագրերի իրականացման գրասենյակ»-ը, «Մշակութային ծրագրերի իրականացման գրասենյակ»-ը եւ «Սպորտի եւ երիտասարդական ծրագրերի իրականացման գրասենյակը»: Կտնտեսվի ավելի քան 190 միլիոն դրամ: Քաղաքաշինության պետական կոմիտե դարձած քաղաքաշինության նախարարությունը դեռ առաջարկ չի ներկայացրել: Ղեկավարը ոչ անհայտ Նարեկ Սարգսյանն է, որը Երեւանի գլխավոր ճարտարապետն էր, երբ սկսվեց «Հյուսիսային պողոտա» նախագիծը, ԾԻԳ ստեղծվեց, ու ավելացավ պետությունից խաբվածների քանակը: Լուծարված երեք ԾԻԳ-երն էլ ստեղծվել է Տիգրան Սարգսյանի վարչապետության տարիներին` 2010-2011թթ. հատվածում: Ու եթե դրանցից այդքան հեշտությամբ են ազատվում, նշանակում է՝ դրանք այնքան էլ կարեւոր չէին: Իսկ թե ինչու էին այսքան տարի փող ծախսում` Տիգրան Սարգսյանը կասի: Հայաստանում 20 տարի առաջ ստեղծված ԾԻԳ-եր կան: Օրինակ՝ «Գյուղատնտեսական ծրագրերի իրականացման գրասենյակը»: Բայց Կարեն Կարապետյանը սրանց դեռ չի հասել: Մի օր հաստատ կհասնի: Մանրամասները  «Առավոտ» օրաթերթի 05.11.2016 -ի համարում