Սուրիկ Խաչատրյանը պայթեցրեց փուչիկը

Սկանդալային Սուրիկ Խաչատրյանը չնայած շաբաթներ առաջ պաշտոնանկ է արվել Սյունիքի մարզպետի պաշտոնից, այնուամենայնիվ ավետել է, որ ինքը հավերժ է։ «Ես առողջական խնդիրներ ունեմ, դրա համար եմ հրաժարական տվել»,-այսօր լրագրողների հետ զրույցում հայտարարել է Սուրիկ Խաչատրյանը՝ ընդգծելով, որ իրեն որեւէ մեկը պաշտոնանկ չի արել: «Ընտրությունն ինքս եմ կազմակերպելու, այդպիսի խնդիր չկա, ինքս հանրապետական եմ, որեւէ մեկից նեղացվածություն չունեմ, ժամանակը կգա, ես ինքս կսկսեմ ընտրությունները կազմակեպել»: Նա շարունակելու է մնալ Սյունիքի ՀՀԿ կառույցի ղեկավարը: Այսպիսով՝ Սուրիկ Խաչատրյանը եկել է ասելու, որ մի հավատացեք Սերժ Սարգսյանի խոստումներին, թե բարեփոխումների գործընթաց է սկսել։ Ամիսուկես առաջ, երբ պաշտոնանկ արվեց Հովիկ Աբրահամյանը ու վարչապետի պաշտոնը շնորհվեց Կարեն Կարապետյանին, Սերժ Սարգսյանը հայտարարեց բարեփոխումների մասին։ Երկրի ղեկավարի խոսքը ինչ-որ պահի արժանահավատ թվաց, երբ կադրային փոփոխությունների ալիքը հասավ նրա ամենասիրելիների ու անփոխարինելի թվացող պաշտոնյաներին, որոնց շարքում նաեւ Սուրիկ Խաչատրյանն էր։ Հակառակ Սուրիկ Խաչատրյանի համոզմունքի, ով պաշտոնանկությունից մեկ շաբաթ առաջ վստահեցրել էր լրագրողներին, որ շարունակելու է աշխատանքը, նա հեռացավ իր պաշտոնից, որտեղ վերադարձել էր աղմկահարույց գորիսյան միջադեպից հետո։ Նրա պաշտոնանկությունը հասարակական-քաղաքական շրջանակներում հույսեր էր արթնացրել, որ այնուամենայնիվ փոփոխությունների մասին հերթական խոստումները սին չեն։ Բայց, ահա, շաբաթներ անց  Խաչատրյանը հայտնվեց ու պայթեցրեց փուչիկը, որը հանրությանն էր ներկայացվում Սերժ Սարգսյանի ու նրա թիմի կողից։ Կառավարության հիմնահատակ փոփոխությունից հետո բոլորը միաբերան պնդում են, որ ՀՀԿ-ն որակական փոփոխության է ենթարկվում եւ ապագան չի լինելու մականունավորներինը։ Իսկ ինչ է ասում Սուրիկ Խաչատրյանը, նա ասում է, որ վերադառնալու է, դա էլ քիչ է պնդում է, որ ինքն է կազմակերպելու ընտրությունները։ Իսկ դա նշանակում է, որ ընտրություններն անցնելու են հին ու բարի մեթոդներով՝ հօդս ցնդեցնելու բարեփոխվելու խոստումները։ Չնայած հանուն արդարության կոնկրետ կադրային այս փոփոխությունը լավագույններից չէր, առավել եւս չի կարելի դա բարեփոխման անվան տակ ներկայացնել։ Սյունիքի նոր մարզպետը «Զանգեզուրի պղնձամոլիբդենային կոմբինատի» տնօրեն Վահե Հակոբյանն է, ոչ պակաս աղմկահարույց անհատականություն, ինչպիսին Լիսկան է։ Նրան ընկերական շրջապատում «Վոգ» են ասում: Վահե Հակոբյանը 2014 թվականի հուլիսի 1-ից «Զանգեզուրի ՊՄԿ» ՓԲ ընկերության վարչական տնօրենն էր, իսկ 2016թ. օգոստոսի 15-ից նշանակվել է նույն ընկերության գլխավոր տնօրենի 1-ին տեղակալ: Այս ընթացքում կոմբինատի գործերը «պրավալ» են գնացել: Իշխանական որոշ շրջանակներ վստահ են, որ նա չի կարողանալու արդարացնել հույսերը ընտրությունների մասով: Մենք մի առիթով գրել ենք, որ Սյունիքում կատակում են՝ սյունեցիները Խաչատրյանից  փրկվեցին, կոմբինատը՝ Հակոբյանից:     Անի Սահակյան