Ո՞ւր է մեղադրվող բժշկուհու անձնագիրը. մանրամասներ մահացած ծննդկանի դեպքից

«Շուշանիկ Բախշյանի վիճակը գնալով  լավանում է և նա արդեն կարիք չունի հիվանդանոցում մնալու»,-Հայելի.am-ի թղթակցի հետ զրույցում ասաց մահացած ծննդկան Մերի Մարգարյանի մահվան մեջ մեղադրվող Շենգավիթ բժշկական կենտրոնի բժշկուհի Շուշանիկ Բախշյանի պաշտպան Ալեքսանդր Սիրունյանը: Պաշտպանը նշեց, որ այսօր գործի շրջանակներում ինքը ներկայացրել է մի շարք միջնորդություններ, այդ թվում նաև իր պաշտպանյալի անձնագրին առնչվող հրատապ խնդիրը.«Շուշանիկ Բախշյանի ազատ արձակելու վերաբերյալ դատարանի որոշման հրապարակումից հետո նախաքննական մարմինը Երևան քաղաքի վարչության ՁՊՎ-ից վերցրել ու իր մոտ է պահում պաշտպանյալիս անձնագիրը»,-նշեց պաշտպանը, հավելելով, որ այս մասով ինքը դիմում է ներկայացրել: «Պաշտպանյալս իր դեղերը կստանա տանը, նա չի ընդունում իր մեղքը, մենք պնդում ենք, որ այս գործում բացահայտելու դեռ շատ հարցեր կան»,-եզրափակեց Սիրունյանը: Հիշեցնենք, որ Մերի Մարգարյանի հարազատները կատարվածի մեջ մեղադրում են հենց «Շենգավիթ» բժշկական կենտրոնի բժշկուհի Շուշանիկ Բախշյանին, ում մոտ էլ հաշվառված է եղել 26-ամյա կինը: Մերի Մարգարյանի եղբոր պատմելով՝ քույրը 4 օր շարունակ բարձր ջերմություն է ունեցել, սակայն բժշկուհին հրաժարվել է հոսպիտալացնել: Հարազատները նրան տեղափոխել են «Էրեբունի» ԲԿ, որտեղ անմիջապես կեսարյան հատում են արել: Հուլիսի 29-ին նա մահացել է, իսկ հուլիսի 30-ին կեսօրին մահացել է նաեւ ծննդկանի նորածին դուստրը: Դեպքի առթիվ օգոստոսի 3-ին հարուցվել է քրեական գործ` ՀՀ քրեական օրենսգրքի 130-րդ հոդվածի 2-րդ մասի հատկանիշներով: Ըստ Քննչական կոմիտեի տարածած հաղորդագրության՝ «Շենգավիթ» ԲԿ-ի բժշկուհի Շուշանիկ Բախշյանը ցուցաբերել է անբարեխիղճ վերաբերմունք, ինչի հետեւանքով հղիության 35-րդ շաբաթում գտնվող Մերի Մարգարյանը մահացել է։ Աստղիկ Ավագյան