Ինչո՞վ են զբաղվում հայկական պատվիրակության անդամները Ստրասբուրգում.նախկին քաղբանտարկյալը բացահայտեց

«ԵԽԽՎ յուրաքանչյուր նստաշրջանից առաջ այստեղ ակցիաներ ենք կազմակերպում: Իմ կազմակերպած ակցիաների թիրախում միշտ եղել է Հայաստանի արտաքին և ներքին քաղաքականությունը: Ես քաղաքական հալածյալ եմ և բոլորովին էլ երջանիկ չեմ , որ Հայաստանից հեռու եմ»,- Հայելի.am-ի թղթակցի հետ զրույցում ասաց Ֆրանսիայի Ստրասբուրգ քաղաքում բնակվող նախկին քաղբանտարկյալ Գևորգ Մանուկյանը: Նշենք, որ Գևորգ Մանուկյանը կալանավորվել էր մարտի 1-ի գործով, ավելի ուշ նա հալածանքներից խուսափելու համար լքել է Հայաստանը: Մանուկյանը պարբերաբար ակցիաներ է կազմակերպում Ֆրանսիայում՝ դրանք հիմնականում  պահանջատիրական ակցիաներ են: Երեկ՝ հունվարի 26-ին, ԵԽԽՎ նստաշրջանի ժամանակ մի քանի հայ երիտասարդներ ակցիա են իրականացրել: Այս մասին Մանուկյանը հայտնեց. «Հեռուստացույցով տեսա, որ ակցիա են անում և բողոքում են ադրբեջանական ճնշումներից: Մտածեցի՝ մեր հայ երեխեքն են ու գնացի հասկանալու, թե ո՞վ է նեղացնում նրանց: Տեսա, որ հազարից ավելի քրդեր են նրանց կողքին ցույց անում, որոնք ի պաշտպանություն Օջալանի էին փողոց դուրս եկել: Ավելի ուշ նկատեցի Սամվել Ֆարմանյանին և Վահան Բաբայանին, որոնք արդեն դուրս էին գալիս նիստից: Երիտասարդներին  այդպես էլ չտեսա»,- նշեց Գևորգ Մանուկյանը՝ հավելելով, որ եթե ինչ-որ բան նախաձեռնվում է, պետք է մինչև վերջ տանել: Անդրադառնալով երկու հակահայկական զեկույցներին՝ Մանուկյանը նկատեց, որ ինքը հենց այդպիսի կանխատեսումներ է ունեցել: Նախկին քաղբանտարկյալը արձանագրել է  նաև մի փաստ: Դա այն է, որ ԵԽԽՎ նստաշրջանի հայկական պատվիրակության անդամներն ամբողջ ժամանակն անցկացնում են խանութներում: «Այստեղ ամսվա մեջ օրեր կան, երբ զեղջեր են լինում: Այդ զեղջերը լինում են առավոտյան 11-ից մինչև երեկոյան 18:00-ն: Հայկական պատվիրակության անդամներին ցանկացած ժամի կարող եք տեսնել այդ խանութնեորում: Նրանց նայելով՝ ճպուռի և մրջունի պատմությունն եմ հիում»,- ընդգծեց Գևորգ Մանուկյանը հավելելով, որ եթե պատվիրակության անդամները պատշաճ մակարդակով աշխատեին, երկրորդ բանաձևն էլ չէր ընդունվի: «Եթե աշխատանքը չի վերջացել, ինչո՞ւ են խանութներով շրջում: Կոնկրետ Արփինե Հովհաննիսյանին մի քանի անգամ տեսել եմ կեսօրին խանութներում հագուստ փորձելիս»,-եզրափակեց Գևորգ Մանուկյանը: