Զեկույց. Կին պատգամավորները հաճախ ենթարկվում են սեռական ոտնձգությունների

Կին պատգամավորները հաճախ բախվում են սեռական ոտնձգությունների ու բռնությունների, վկայում է Միջխորհրդարանական միության (միջազգային կազմակերպություն, որն զբաղվում է աշխարհի խորհրդարանների գործողությունների համակարգմամբ) զեկույցը: Հետազոտությանը մասնակցել է 55 կին պատգամավոր՝ աշխարհի տարբեր երկրներից: Ավելի քան 80 %-ը հայտնել է, որ բախվել է հոգեբանական ճնշման կամ սեռական ոտնձգության այս կամ այն միջադեպերի: Եվրոպացի մի պատգամավորուհի, օրինակ, գանգատվել է, որ չորս ժամում Twitter-ով ստացել է բռնաբարության ավելի քան 500 սպառնալիք: Ասիացի նրա մի գործընկերուհի հայտարարել է, որ սպառնացել են վնասել իր որդուն, ընդ որում՝ սպառնացողն իմացել է, թե որ դպրոցն է հաճախում երեխան և քանի տարեկան է: Հարցման մասնակիցների 65,5 %-ն ասել է, որ իրենց հաճախ վիրավորում են՝ շեշտը դնելով սեռական պատկանելության վրա: Տղամարդ գործընկերները մշտապես տհաճ ու ստորացուցիչ դիտողություններ են անում այդ թեմայով: Զեկույցի հեղինակները եզրակացնում են, որ սեռական խտրականությունը, որը կարող է արտահայտվել սոսկ տհաճ արտահայտություններով, կարող է հանգեցնել բռնության, այն խանգարում է կանանց ազատորեն կատարել պատգամավորի իրենց պարտականությունները և անվտանգ զգալ իրենց: Փոխանցում է BBC-ն: