«Ցավում եմ, որ պրիմիտիվ ծրագիր է գրվել». Սիլվա Ադամյանն

Այսօր Հայելի ակումբում բնապահպաններն իրենց անհանգստությունը բարձրաձայնեցին վարչապետ Կարեն Կարապետյանի ներկայացրած ծրագրի վերաբերյալ: Ըստ բնապահպանների՝ նոր կառավարությունն իր ծրագրում  բնապահպանական ոլորտն անտեսել է, չնայած այս հարցում պետք էր ավելի  աչալուրջ լինել: «Ցավում եմ, որ նման ծրագիր է գրվել: Նման պրիմիտիվ ծրագիր: Միանգամից երեւում է, որ կառավարությունը չի աշխատել լավ թիմով, այսինքն այն մարդկանց հետ, որոնք իրազեկ են խնդիրներից եւ կարող են ճիշտ ուղղություն ցույց տալ»,- ասում բնապահպան Սիլվա Ադամյանն ու հավելում, որ  նման ծրագիրը սպասելի էր. «Բնապահպանության նախարարը նոր մարդ է ոլորտում եւ դեռ պետք է ծանոթանա ծրագրերի հետ»: Բնապահպաններին մտահոգում է նաեւ այն, որ կառավարության  նոր ծրագրում ոչ մի խոսք չկա  ՄԱԿ-ի «Կայուն զարգացման նպատակներ»-ի մասին. «Մեր երկիրը լինելով ՄԱԿ-ի անդամ պետություն պարտավոր է մինչեւ 2017 թվականը Կայուն զարգացման 17 նպատակները տեղայնացնել ու կիրառել: Սակայն կառավարության ծրագրում այն ամբողջությամբ անտեսված է»,- նշում է բնապահպան Կարինե Դանիելյանն ու հավելում. «Նախորդ կառավարության հետ մենք այս հարցը քննարկել էինք, բազմաթիվ  հանդիպումներ էին եղել, բայց մեզ մոտ կարծես սովորություն է՝ ամեն կառավարություն, ամեն ինչ սկսում է 0-ից»: Բնապահպաններն արդեն հասցրել են նամակ գրել վարչապետ Կարեն Կարապետյանին, սակայն ցավով են նշում, որ իրենց նամակը մնացել է անպատասխան: