Ռուսաստանը ժամանակավորապես դադարեցրել է Հալեպի ռմբակոծումները (տեսանյութ)

Ամերիկայի Ձայն Ռուսաստանը հայտարարել է, որ իր ուժերն ու Սիրիայի նախագահ Բաշար ալ-Ասադին հավատարիմ զորքերը դադարեցրել են Հալեպի ռմբակոծումը նախքան մարդասիրական 8 ժամանոց դադարը, որը, ըստ ձեռք բերված համաձայնության, տեղի կունենա հինգշաբթի օրը: Ռուսաստանի պաշտպանության նախարար Սերգեյ Շոյգուն երեքշաբթի օրը հայտարարել էր, որ ռմբակոծումները դադարեցվել են տեղական ժամանակով առավոտյան ժամը 10:00-ին: Ռազմական գործողությունների ժամանակավոր դադարեցմամբ հնարավորություն է տրվում քաղաքացիական բնակչությանը և ընդդիմության զինյալներին լքել Հալեպը, ինչպես նաև դուրս բերել հիվանդ ու վիրավոր մարդկանց: ՄԱԿ-ը ողջունել է Ռուսաստանի որոշումը: «Մենք կօգտագործենք այս դադարը՝ առավելագույնն անելու համար: Իհարկե, անհրաժեշտ է ավելի երկար դադար, որպեսզի հնարավոր լինի այնտեղ հասցնել համապատասխան տեխնիկա, սակայն յուրաքանչյուր դադար ողջունելի է», ասել է ՄԱԿ-ի խոսնակ Ստեֆան Դյուժարիկը: Երկուշաբթի օրը տեղի ունեցած ռմբակոծումների արդյունքում 23 մարդ է զոհվել Հալեպի հյուսիսում զինյալների վերահսկողության տակ գտնվող գյուղում: Մեծ Բրիտանիայում գործող մարդու իրավունքների պաշտպանության սիրիական դիտորդական կազմակերպությունը ասել է, որ ամենաշատը ռմբակոծման է ենթարկվել Քաթերջին, ուր փրկարարները փլատակներից դուրս էին բերում ռմբակոծության զոհերին: Ռմբակոծությունները շարունակվում են այն ժամանակ, երբ դիվանագետներն անհաջող փորձեր են ձեռնարկում՝ դադարեցնելու սիրիական հակամարտությունը, որի զոհ են դարձել արդեն 300 հազար հոգի: ԱՄՆ-ի և եվրոպական մի շարք երկրներ մեղադրել են Ռուսաստանին և Սիրիային Հալեպում վայրագություններ իրականացնելու համար, սակայն ռուս պաշտոնյաները հերքում են դա: Մի քանի կնքված զինադադարներ Սիրիայում խախտվել են, ներառյալ վերջերս հաստատված ռուս-ամերիկյան զինադադարի ծրագիրը: Նախորդ շաբաթվա վերջում Ռուսաստանի և այլ երկրների արտաքին գերատեսչությունների ղեկավարների հետ ԱՄՆ-ի պետքարտուղար Ջոն Քերիի հանդիպումներից հետո շվեյցարական Լոզանում նախատեսվում է սկսել բանակցային նոր փուլ՝ սիրիական հակամարտության կարգավորման ուղիներ գտնելու համար: