Ընդդիմությունը հրաժարվել է դուրս բերել զորքը Հալեպից

Reuters -ը հայտնում է,որ  Սիրիական զինված ընդդիմությունը հայտարարել է հոկտեմբերի 20-ին Մոսկվայի կողմից մարդասիրական դադար և ամբողջական հրադադար հայտարարելուց հետո Հալեպից զորքերը դուրս բերելուց հրաժարվելու մասին: «Ընդդիմության բոլոր խմբերն ամբողջովին մերժում են զորքերի դուրսբերումը»,- ասել է «Սիրիական ազատ բանակ» ընդդիմադիր խմբավորման ներկայացուցիչ Զաքարիա Մուլահաֆջին: Բացի այդ, գործակալությունը հայտնում է, որ Հալեպում «Ահրար աշ-Շամ» սիրիական ընդդիմադիր խմբավորման ղեկավարներից մեկը հայտարարել է դիմադրությունը շարունակելու մտադրության մասին: Ինչպես հայտնել ենք, հոկտեմբերի 18-ի առավոտյան ժամը 10-ից Սիրիայի Հալեպ քաղաքում դադարեցվում են Ռուսաստանի ռազմատիեզերական ուժերի ավիացիայի ավիահարվածները, «ՌԻԱ Նովոստի»-ի փոխանցմամբ հայտարարել է Ռուսաստանի պաշտպանության նախարար Սերգեյ Շոյգուն: Նրա խոսքով՝ ավիահարվածների դադարեցումն անհրաժեշտ է հոկտեմբերի 20-ին «մարդասիրական դադար» սահմանելու համար: Շոյգուն նշել է, որ դա թույլ կտա երաշխավորել 6 միջանցքներով խաղաղ բնակիչների դուրսբերումն ու վիրավորներին Հալեպի արևելյան մաս տեղափոխումը: Ավելի վաղ Ռուսաստանի զինված ուժերի գլխավոր շտաբը հայտարարել էր հոկտեմբերի 20-ին Հալեպում «մարդասիրական դադար» սահմանելու մասին: