Բոլորն ընդդեմ մեկի

Ռուսաստան-ԱՄՆ լարվածությունը շարունակվում է պահպանվել: Նախօրեին Ռուսաստանի նախագահ Վլադիմիր Պուտինը հայտարարել է, որ ԱՄՆ նախընտրական շրջանի ավարտից հետո շանսեր կհայտնվեն Մոսկվայի և Վաշինգտոնի հարաբերությունների վերականգնման համար: Պուտինը ճշտել է, որ երկրի չլուծված խնդիրների պայմաններում «դիմում են սեփական խնդիրներից ընտրողների ուշադրությունը շեղելով աշխատող համակարգին, այս դեպքում մենք դրա ականատեսն ենք դառնում»: «Ինչպե՞ս դա անել: Ստեղծել, օրինակ, թշնամու կերպար և միավորել ժողովրդին այդ թշնամու դեմ պայքարում: Ռուսաստանի դեպքում դա հետաքրքիր է, և, իմ կարծիքով, այդ խաղաթղթով և հիմա խաղում են: Ցավում եմ, որ ընթացիկ ներքաղաքական խնդիրներից ելնելով՝ զոհաբերվում են ռուս-ամերիկյան հարաբերությունները, քանի որ դա խախտում է միջազգային հարաբերություններն ընդհանուր առմամբ»,- ասել է ՌԴ նախագահը: Պուտինը հրաժարվել է Սիրիայի ահաբեկիչների վրա ռազմական հարձակման հնարավոր պլանների մասին խոսելուց: ԲՐԻԿՍ-ի գագաթնաժողովից հետո տեղի ունեցած մամլո ասուլիսում լրագրողներից մեկը հարցրել է Պուտինին՝ նշանակո՞ւմ է արդյոք ռուսական ավիակրի և հրթիռային հածանավի ուղարկումը Միջերկրական ծով Սիրիայի ահաբեկիչների վրա հարձակում: Դրան նախագահը անմիջապես պատասխանել է. «Հիմա ես ձեզ հենց այդպես էլ կպատմեմ՝ հարձակում, երբ, որտեղից կսկսվի»: Իսկ ՄԱԿ-ում ՌԴ մշտական ներկայացուցիչ Վիտալի Չուրկինը ԱՄՆ և ՌԴ հարաբերությունները որակել է 1973-ից ի վեր ամենալարվածը. «Ընդհանուր իրավիճակը բավականին վատ է, 1973-ից սկսած՝ ամենավատթարը»: Ըստ Չուրկինի՝ չնայած երկու երկրների միջև Սիրիայի հարցով տարաձայնություններին՝ այնուամենայնիվ, երկու երկրներն էլ շարունակում են աշխատանքը ընթացիկ խնդիրների լուծման ուղղությամբ: Միևնույն ժամանակ արևմուտքը` ԱՄՆ-ը, Մեծ Բրիտանիան, Գերմանիան ու Ֆրանսիան շարունակում են Ռուսաստանի դեմ պատժամիջոցների մասին քննարկումներն ու հայտարարությունները: Մեծ Բրիտանիան և ԱՄՆ-ը մտածում են Ռուսաստանի և Սիրիայի դեմ նոր տնտեսական պատժամիջոցների ներմուծման մասին՝ կապված Հալեպի շուրջ իրավիճակի հետ, հայտարարել են Բրիտանիայի և ԱՄՆ-ի արտգործնախարարներ Բորիս Ջոնսոնը և Ջոն Քերին: «Մենք չպետք է նվազեցնենք ճնշումը Ասադի ռեժիմի, Ռուսաստանի և Իրանի վրա: Մենք պետք է ուժեղացնենք այդ ճնշումը»,- ասել է Ջոնսոնը Սիրիայի կարգավորման հարցով համատեղ մամլո ասուլիսում՝ Լոնդոնում տեղի ունեցած բազմակողմ հանդիպումից հետո: Նա ճշտել է, որ հնարավոր պատժամիջոցները կկրեն տնտեսական բնույթ: Մեծ Բրիտանիայի արտգործնախարարն ընդգծել է, որ կասկածում է «Սիրիայում պատերազմը շահելու» Ռուսաստանի և Ասադի ռեժիմի ընդունակությունների վրա: ԱՄՆ պետքարտուղար Ջոն Քերին իր հերթին նշել է, որ Ռուսաստանի և Սիրիայի դեմ նոր պատժամիջոցներ սահմանելու որոշումը կարող է ընդունվել մի քանի օրվա ընթացքում. «Մենք քննարկում ենք լրացուցիչ պատժամիջոցների սահմանումը, և նախագահ Օբաման դիտարկում է մի քանի տարբերակ… Մենք կշարունակենք դա քննարկել և կհասկանանք՝ ինչ անել մոտակա մի քանի օրերի ընթացքում»: Գերմանիայի կանցլեր Անգելա Մերկելը ցանկանում է ելույթ ունենալ ԵՄ-ում Ռուսաստանի դեմ պատժամիջոցների խստացման վերաբերյալ` կապված Սիրիայի իրավիճակի հետ, հայտնում է գերմանական Frankfurter Allgemeine Sonntagszeitung պարբերականը` վկայակոչելով կանցլերի շրջապատին: Այս թեման պետք է բարձրացվի հոկտեմբերի 20-21-ին տեղի ունենալիք ԵՄ գագաթնաժողովում: Խոսքը գնում է պատժամիջոցների մասին այնպիսի ոլորտներում, ինչպես ինքնաթիռաշինությունը և ռազմա-արդյունաբերական համալիրը: ԱՄՆ նախագահ Բարաք Օբաման Մերկելին խոստացել է աջակցություն Մոսկվայի վերաբերյալ «խիստ արձագանքի» դեպքում, եթե նոր պատժամիջոցներին աջակցեն եվրոպացիները: Ֆրանսիայի նախագահ Ֆրանսուա Օլանդը հաստատել է Հալեպում հրադադարի անհրաժեշտությունը և այն, որ ինքը մտադիր չէ «թուլացնել ճնշումը» Մոսկվայի վրա, որն աջակցում է Սիրիայի իշխանություններին: «Լոզանի բանակցությունները հանգեցրին հիմնական սկզբունքների անհամաձայնության: Սակայն առաջնահերթ խնդիրը ռմբակոծությունների դադարեցումն է, զինադադարը, հումանիտար օգնությունը և բանակցությունների սկսումը»,- ասել է Օլանդը: «Դա այն է, ինչ Ֆրանսիան առաջարկել է ՄԱԿ-ի Անվտանգության խորհրդին, սակայն Ռուսաստանը վետո է դրել: Պուտինը չի կամենում լուրջ քննարկում անցկացնել Սիրիայի հարցով: Ես պատրաստ եմ դրան ցանկացած պահի, բայց չեմ թուլացնի ճնշումը», հավելել է Օլանդը: ԴԱԻՇ ահաբեկչական խմբավորման ոչնչացումը և Ռուսաստանի դիրքերի թուլացումը ԱՄՆ-ի համար նոր հնարավորություններ կբացի, կիրակի հայտարարել է փոխնախագահ Ջոզեֆ Բայդենը NBC հեռուստաալիքին տված հարցազրույցում: «Ռուսաստանը կրում է լուրջ դժվարություններ: Նրանք երկրի ներսում ունեն լուրջ տնտեսական խնդիրներ: Եվ այն բանի համադրումը, որ ԴԱԻՇ-ը կդադարի գոյություն ունենալ, և Ռուսաստանի թուլացումը նոր լրացուցիչ հնարավորություններ կբացեն մեզ համար»,- ասել է Բայդենը: Նա ընդգծել է, որ ԴԱԻՇ-ի ոչնչացումը մնում է ԱՄՆ-ի գլխավոր առաջնահերթությունը: «Մենք պետք է ոչնչացնենք ԴԱԻՇ-ը, մենք պետք է վերցնենք Ռաքան, մենք պետք է վերցնենք Մոսուլը, մենք պետք է ոչնչացնենք խալիֆայությունը, որը ԱՄՆ-ի համար ուղիղ սպառնալիք է ներկայացնում»,- ասել է փոխնախագահը: Հեռուստահաղորդավար նաև հարցրել է, թե ԱՄՆ-ը վշտանո՞ւմ է Հալեպում խաղաղ բնակիչների զոհվելու համար: «Մենք միշտ վշտանում ենք դրա համար, որտեղ էլ այն տեղի ունենա»,- պատասխանել է Բայդենը: Մետաքսյա Շալունց