Առողջապահության նախարար Լևոն Ալթունյանի ունեցվածքը

17:20 - 17/հոկտեմբերի/2016

ՀՀ առողջապահության նախարար Լևոն Ալթունյանը պաշտոնը ստանձնելուց հետո հոկտեմբերի 11-ին իր ունեցվածքի մասին հայտարարագիր է ներկայացրել: Լևոն Ալթունյանի հետ փոխկապակցված անձանց՝ կնոջ, որդու և ծնողի ունեցվածքի մասին տվյալները պաշտպանված են: Առողջապահության նախարարի ընտանիքի անդամների՝ պաշտոններ զբաղեցնելու վերաբերյալ տվյալներ չկան: Անշարժ գույքի բաժնում Լևոն Ալթունյանը հայտարարագրել է երկու բնակարան, մեկ առանձնատուն և հողամաս: Պաշտոնը ստանձնելու օրվա դրությամբ Լևոն Ալթունյանը հայտարարագրել է 634 մլն 65 հազ. ՀՀ դրամի բաժնետոմսեր և 17 մլն 950 հազ ՀՀ դրամի պարտատոմսեր:

Փոխառություններ բաժնում նախարարը 165 հազ. 791 դոլար և 29 մլն 29 հազ դրամ է ներկայացրել: Պաշտոնատար անձի դրամական միջոցները` պաշտոնը ստանձնելու օրվա դրությամբ կազմել են 802 հազ ՀՀ դրամ և 44 ԱՄՆ դոլար: Ըստ հայտարարագրի՝ Լևոն Ալթունյանի` պաշտոնը ստանձնելու տարվա հունվարի 1-ից մինչև պաշտոնական պարտականություններն ստանձնելու օրն (27.09.2016) ստացված եկամուտները, գոյացել են հետևյալ կերպ՝ աշխատավարձից ստացած եկամուտը կազմում է մոտ 80 մլն դրամ, շահաբաժնից ստացած եկամուտները՝ 100 մլն դրամ, տրված փոխառությունների դիմաց ստացված եկամուտը՝ 3 մլն 663 հազ դրամ, ստացված փոխառությունները՝ 141 մլն դրամ, այլ եկամուտները՝ 583 մլն 375 հազ դրամ, ընդհանուր եկամուտը կազմում է 184 մլն 131 հազ դրամ: Լևոն Ալթունյանը շարժական գույք չի հայտարարագրել: