23-ամյա վարորդը Opel-ով մխրճվել է <<Ֆլեշ>> բենզալցակայանի մեջ. ՖՈՏՈՌԵՊՈՐՏԱԺ

10:29 - 15/հոկտեմբերի/2016

Երեկ՝ հոկտեմբերի 14-ին, ավտովթար է տեղի ունեցել Երևանում: Ժամը 23:30-ի սահմաններում Երևան քաղաքի Լուկաշինի փողոցի բնակիչ, 23-ամյա Արտաշես Թովմասյանը իր վարած Opel մակնիշի 34 CL 385 համարանիշի ավտոմեքենայով Հասրաթյան փողոցում՝ թիվ 12 հասցեում, դուրս է եկել ճանապարհի երթևեկելի գոտուց և մխրճվել <<Ֆլեշ>> բենզալցակայանի մեջ: Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով Opel –ի վարորդին տեղափոխել են «Հերացի» թիվ 1 համալսարանական հիվանդանոց, իսկ բենզալցակայանի աշխատակից 36-ամյա Գրիգոր Հակոբյանին՝ «Արմենիա» հանրապետական բժշկական կենտրոն: Դեպքի վայր են ժամանել ճանապարհային ոստիկանության 1-ին սպայական գումարտակի 8-րդ դասակի տեսուչները: Վթարի մասին ՃՈ օպերատիվ կառավարման կենտրոնի պատասխանատու հերթապահ Արմեն Հարությունյանը, տեղեկությունը փոխանցել է Հայաստանի քննչական կոմիտեի Երևանի քննչական վարչություն, որտեղից ժամանել է ավագ քննիչ Գեղամ Գալստյանը, ում կողմից փաստի առթիվ նյութեր են նախապատրաստվում: Օպերատիվորեն դեպքի վայր են ժամանել նաև ՀՀ Արտակարգ իրավիճակների նախարարության փրկարար ծառայության 7-րդ հրշեջ-փրկարարական ջոկատը՝ 1 մարտական հաշվարկով և Ճգնաժամային կառավարման ազգային կենտրոնի օպերատիվ խումբը՝ Արթուր Ճաղարյանի գլխավորությամբ։ Հրշեջ-փրկարարները հոսանքազրկել են ավտոմեքենան, փակել գազի բալոնի փականը: Լուսանկարները՝ Գագիկ Շամշյանի