Ստամբուլահայ կնոջ սպանության նոր մանրամասները

Ստամբուլի Սամաթիա թաղամասում 2012-ի դեկտեմբերի 28-ին սպանված Մարիցա Քյուչուքի սպանության գործով հերթական դատալսման ժամանակ մեղադրյալ Մուրադ Նազարյանի բարեկամը նոր մանրամասներ է հայտնել ոստիկանությունում իր լսած հեռախոսազրույցից։ Թուրքական Evrensel-ի փոխանցմամբ՝ Ստամբուլի ծանր հանցագործությունների գործերով 2-րդ դատարանում Մարից Քյուչուքի սպանության գործով հերթական նիստի ժամանակ որպես վկա հանդես է եկել մեղադրյալ Մուրադ Նազարյանի ազգական Արթին Բըչաքչըն։ Նա նշել է, թե Մուրադ Նազարյանի ձերբակալվելուց հետո ինքը գնացել է ոստիկանություն, որտեղ լսել է ոստիկանների միջեւ հեռախոսազրույց։  Ըստ պատմածի՝ ոստիկանը հեռախոսով մեկ այլ ոստիկանի հետ զրույցում ասել է, թե Մուրադ Նազարյանը ձերբակալվել է, սակայն վկաներն ասում են, թե նա չէ սպանողը եւ չգիտենք ինչ անեն։ Արթին Բըչաքչըն պնդել է, թե Մուրադ Նազարյանը բավականին անփույթ մարդ է եւ եթե ինքը լիներ սպանություն կատարածը, ապա դեպքի վայրից հաստատ արյունով հագուստով էր դուրս գալու։ Իր հերթին Մարիցա Քյուչուքի փաստաբանը հայտարարել է, թե սպանության քննությունն արդար չի ընթանում եւ ամեն ինչ արվում է, որպեսզի սպանության իրական մեղավորները չհայտնաբերվեն։ Դատավարությունը հետաձգվել է մինչեւ փետրվարի 24։ Նշենք, որ 2012-ի դեկտեմբերին եւ 2013-ի հունվարին Ստամբուլի հայերով բնակեցված Սամաթիա թաղամասում տարեց հայ կանանց դեմ հարձակումներ էին տեղի ունեցել։ Այդ հարձակումների կատարման մեջ կասկածանքով ձերբակալվել է ստամբուլահայ Մուրադ Նազարյանը։ Մուրադ Նազարյանին ճանաչողները պնդում են, թե նա շատ հանգիստ անձնավորություն էր եւ անհավատալի է, որ նրան նման բանում են մեղադրում։