Նոր պահանջ՝ Իրանից

Իրանից պահանջվում է դրական դեր կատարել տարածաշրջանում, առանց դավանանքային շովինիզմի դրսեւորումների ու այլ երկրների գործերին միջամտությունների։ Այս մասին հոկտեմբերի 13-ին Էր Ռիյադում Պարսից ծոցի երկրների ԱԳ նախարարների հետ հանդիպումից հետո կայացած մամուլի ասուլիսի ժամանակ հայտնել է Թուրքիայի արտգործնախարար Մեվլյութ Չավուշօղլուն: Թուրքիայի ԱԳ նախարարը նաեւ շեշտել է, որ անհրաժեշտ է պայքարել ահաբեկչության բոլոր տեսակների դեմ։ Սաուդյան Արաբիայի արտգործնախարար Ադիլ ալ –Ջուբեյրն էլ իր հերթին մամուլի ասուլիսի ժամանակ հայտնել է, որ Թեհրանին հայտնի են հարաբերությունների կարգավորման համար թագավորության պահանջները, որոնցից է նաեւ բարիդրացիականության սկզբունքի պահպանումը և արաբական երկրների շիա համայնքներին որպես Իրանի էքսպանսիայի իրականացնողներ ընկալելուց  հրաժարվելը։ «Քուվեյթում, Լիբանանում, Բահրեյնում, Սաուդյան Արաբիայում բնակվող շիաները այդ երկրերի քաղաքացիներն են, ու Իրանը նրանց հետ ոչ մի առնչություն չունի»,- հավելել է ալ Ջուբեյրը,փոխանցում է «ՌԻԱ Նովոստին»։ Նա բացասաբար է արտահայտվել Իրաքում շիա ժողովրդական աշխարհազորի մարտիկների մասին, որոնք մարտնչում են «Իսլամական պետություն» ահաբեկչական խմբավորման դեմ՝ նրանց անվանելով «դավանանքային նշանով ձեւավորված զինված խմբավորում, որը ենթարկվում է Իրանին»։