Երկրորդ փուլը՝ նոյեմբերի 2-ից ոչ ուշ

Վրաստանում խորհրդարանական ընտրությունների երկրորդ փուլը մեծամասնական ընտրակարգով տեղի կունենա 2016թ. նոյեմբերի 2-ից ոչ ուշ, ճեպազրույցում հայտարարել է Վրաստանի ԿԸՀ մամուլի խոսնակ Աննա Միքելաձեն, հայտնում է «Գրուզիա օնլայնը»։ «Օրենսդրության համաձայն՝ Կենտրոնական ընտրական հանձնաժողովը նշանակում է ընտրությունների երկրորդ փուլ այն բանից հետո, երբ հանրագումարի կբերվեն առաջին փուլի արդյունքները, համապատասխանաբար, երկրորդ փուլի անցկացման վերջին ժամկետը նոյեմբերի 2-ն է»,- ասել է Միքելաձեն։ Նա բացատրել է, որ ընտրությունների երկրորդ փուլին կմասնակցեն պատգամավորության այն երկու թեկնածուները, որոնք հոկտեմբերի 8-ին ստացել են առավել շատ թվով ձայներ։ «Նախնական տեղեկություններով՝ երկրորդ փուլ կանցկացվի 50 մեծամասնական շրջաններում, թեև վերջնական տվյալները հայտնի կդառնան համապատասխան գործընթացներից հետո»,- նշել է նա։ Համամասնական ընտրակարգով անցկացված ընտրություններում, որտեղ «կուսակցական» տեղերին հավակնել է 19 կուսակցություն և 6 ընտրական դաշինք, երկրի խորհրդարանում կներկայացվի 3 քաղաքական ուժ։