Նորից կպատժեն

Ռուսաստանի նախագահ Վլադիմիր Պուտինի կողմից Փարիզ այցի չեղարկումը սպառնում է նոր պատժամիջոցներով, հայտնում է «Կոմերսանտ» պարբերականը։ Պարբերականը հիշեցնում է, որ հենց Ֆրանսիայի նախագահ Ֆրանսուա Օլանդն է փորձել Մոսկվայի հետ երկխոսության նախաձեռնությունը վերցնել իր ձեռքը՝ կապված Ուկրաինայի իրադարձությունների հետ։ Նա միակ եվրոպացի ղեկավարն էր, որը պատրաստ չէր անխոս հետևել ԱՄՆ-ի քաղաքականությանը։ Ներկայումս արդեն Օլանդն էլ է հրաժարվում ընդունել Մոսկվայի դիրքորոշումը Սիրիայի գործողությունների հարցում։ Այս ֆոնին Եվրոպական խորհրդի նախագահ Դոնալդ Տուսկը Բեռլինում համաժողովի ժամանակ արդեն հայտարարել է պատժամիջոցների երկարաձգման մասին։ Տուսկի կարծիքով՝ «բազմաթիվ քաղաքական գործիչներ իրականացրել են տիպիկ արևմտաեվրոպական սխալ»՝ համաձայնվելով երկխոսություն վարել Ռուսաստանի հետ Սիրիայի հակամարտության կարգավորման վերաբերյալ։ Ինչպես գրում է «Վեդոմոստին», Փարիզը ցանկանում էր խոսել միայն Սիրիայի մասին, ինչը ձեռնտու չէր Պուտինին։ «Մոսկվայում անօգուտ համարեցին ժամանակ ծախսել տհաճ խոսակցության վրա։ Պուտինի համար Սիրիայի խնդիրը լուծվում է ոչ թե Փարիզի հետ բանակցությունների ժամանակ, այլ Վաշինգտոնի»,- հայտարարել է Միջազգային հարաբերությունների ֆրանսիական ինստիտուտի փորձագետ Տատյանա Կաստուևա-Ժանը։