«Հայերը Սիրիայում ծանր վիճակում են. անընդհատ ռմբակոծվում են». Գագիկ Հարությունյան

«Հալեպում իրավիճակը սարսափելի է: Վաղուց պետք է փորձեինք մեր հայրենակիցների խնդիրները լուծել: Հայաստանը լավագույն երկիրը չէ, որտեղ նրանք կուզենային ապրել, բայց պետք է փորձել նրանց համար ստեղծել պայմաններ: Արդեն իսկ Երեւանում հաստատված սիրիահայ համայնքը ակտիվ մասնակցում է մեր տնտեսական կյանքին»,- այսօր լրագրողների հետ հանդիպմանն ասաց «Նորավանք» գիտակրթական հիմնադրամի տնօրեն Գագիկ Հարությունյանը:  «Սիրիայում այսօր շատ քիչ թվով հայեր են մնացել: Տարբեր թվեր են նշվում: Հայերը հայտնվել են բավական ծանր վիճակում: Բացի նրանից, որ քաղաքն անընդհատ ռմբակոծվում է, այնտեղ ջուր չկա: Հայկական համայնքի ներկայացուցիչներն առերես պահպանելով չեզոքություն՝ բավականին օգնել են կառավարական ուժերին»,-նկատեց բանախոսը: Հարությունյանը կարծում է, որ ՀՀ-ի կողմից հալեպահայերին ուղարկված օգնությունը մի փոքր ուշացած է: «Մենք այդ խնդիրները վաղուց պետք է փորձեինք լուծել: Սակայն դեռ ուշ չէ: Այսօր բացի կառավարությունից, շատացել են մեր հայրենակիցներին օգնել ցանկացող անհատները: Մեր հայրենադարձների համար պետք է լավ պայմաններ ստեղծենք»,-տեսակետ հայտնեց Գագիկ Հարությունյանը՝ միաժամանակ նկատելով, որ ՀՀ-ն սիրիահայերի հայրենադարձություն կատարելու ռեսուրսներ չունի. «Ցավոք, առայժմ միայն հայրենալքում ենք նկատում»: