Սյունեցիները Լիսկայից փրկվեցին, կոմբինատը՝ Հակոբյանից

Տեղի ունեցավ աներեւակայելին, Սյունիքի մարզպետ Սուրիկ Խաչատրյանը` Լիսկան,  հրաժարական տվեց մարզպտի պաշտոնից, նա 11 տարի այդ պաշտոնում աշխատել է: Իրողությունը նշանակալի է, քանի որ պաշտոնանկությունը տեղի չի ունենում ինչ-որ աղմկոտ առիթով, ինչպես նախորդ անգամ: Նախորդ անգամ Լիսկան պաշտոնանկ եղավ Բուդաղյանների հետ հայտնի միջադեպից հետո, բայց մի քանի ամիս անց վերադարձավ մարզպետի պաշտոնին: Այժմ Սուրիկ Խաչատրյանը հեռանում է առանց որևէ պատճառի, թեպետ քաղաքական գործիչները յորովի էին մեկնաբանում այդ հրաժարականը: Արդյոք իշխող համակարգը խնդիր է դրել ազատվելու լիսկաներից, թե 2017-ի ընտրություններից առաջ սա քարոզչական հնարք է: ՀՀԿ-ականները պնդում էին, որ Լիսկան հեռացավ, քանի որ այդպիսին է պահանջում նոր կառավարման տրամաբանությունը: Էդուարդ Շարմազնովն ասաց, որ Սուրիկ Խաչատրյանը փոխվեց, որովհետեւ կարիք կար թարմ աշխատանքի: «Սյունիքի մարզպետ Սուրիկ Խաչատրյանի հրաժարականը պայմանավորված էր իշխանության որդեգրած նոր քաղաքականությամբ: Այդ փոփոխությունը պայմանավորված է նոր մոտեցումների, նոր պահանջների, նոր փիլիսոփայության հանգամանքներով»,-ասաց Շարմազանովը: Հարցին՝ Սուրիկ Խաչատրյանը չէ՞ր համապատասխանում նոր մոտեցումներին, ԱԺ փոխնախագահը պատասխանեց. «Համապատասխանել-չհամապատասխանելու խնդիրը չէ: Կարիք կա նոր թարմ ավյունի, նոր թարմ աշխատանքի, որի մասին Հանրապետության նախագահը խոսել է դեռեւս փետրվարի 12-ին: Փոխվել է ոչ միայն Սուրիկ Խաչատրյանը: Կադրային լուրջ, ռադիկալ փոփոխություններ եւս եղել են կառավարությունում, դրանք կլինեն, փոփոխություններ են սպասվում ՀՀԿ ղեկավար մարմնում, գործադիր մարմնում: Չեմ բացառում, որ այստեղ էլ փոփոխություններ լինեն»: «Դա կառավարության որոշումն է եղել, մենք նման հարց չենք քննարկել»,- փոխարենը ավելորդ հարցերից ու մեկնաբանություններից գլուխը պրծացրեց ՀՀԿ խմբակցության ղեկավար Վահրամ Բաղդասարյանը: Գեներալ պատգամավոր, Սուրիկ Խաչատրյանի հետ քավոր-սանիկ Սեյրան Սարոյանը վստահ է՝ Սուրիկը կմնա քաղաքականության մեջ: «Կերաք կյանքը, աչքով տվիք, էնքան արիք մինչև սենց էղավ»,- միեւնույն ժամանակ ասաց նա: Դիտարկմանը` Սուրիկ Խաչատրյանը ասում էր, որ ինքը կառողջանա և հրաժարական չի տա, պատգամավորն արձագանքեց. «Ձեր աչքից եղավ, էնքան կռռացիք, որ տենց եղավ»: Անդրադառնալով Սուրիկ Խաչատրյանի գործունեությանը նա նշեց. «Իմ իմանալով` շատ լավ ա աշխատել: Հեսա թազա մարզպետը կգա, կերևա» և հավելեց.«Հիմա Սուրիկ Խաչատրյանն էլ չկա, տեսնեմ` ի՞նչ եք անելու: Էդ յութուբն էլ մնաց անտեր, մարդ չկա, որ խոսաք»,- ասաց Սեյրան Սարոյանը: Սյունիքից ընտրված պատգամավոր, Լիսկայի որդու ուսուցիչ Հայկ Գրիգորյանը չթաքցրեց իր տխրությունը: «Ուղղակի կարող եմ այսպես ասել, որ մեր Սյունիքը շատ բան կկորցնի», - հավելեց նա: Ընդդիմադիր ՀԱԿ խմբակցության ղեկավար Լևւն Զուրաբյանը, անկախ պատճառներից, դրական է համարում Խաչատրյանի հրաժարականը․ «Սա այն քայլերից է իշխանության, որ հնարավոր չի չողջունել: Կատարվածը լավ բան է: Սուրիկ Խաչատրյանը վարկաբեկված մի մարդ էր, որը բազմաթիվ հանցագործությունների մեջ էր մեղադրվում: Բոլորի համար ակնհայտ էր, որ իրեն պահում էին միայն Գորիսի «ոսկե պաշարը» ընտրակեղծարարության պահելու նպատակով: Ես չգիտեմ՝ կարելի՞ է սպասել փոփոխության, թե՞ ոչ, բայց ինքը փաստը, որ նման ամենազոր մի դեսպոտ հեռացված է, արդեն ինչ-որ շնչելու ազատություն է տալու գորիսեցիներին, սյունիքցիներին»: Սուրիկ Խաչատրյանին ինչպես հայտնի է կփոխարինի Վահե Հակոբյանը՝ Զանգեզուրի պղնձամոլիբդենային կոմբինատի տնօրեն, ում ընկերական շրջապատում «Վոգ» են ասում: Վահե Հակոբյանը 2014 թվականի հուլիսի 1-ից «Զանգեզուրի ՊՄԿ» ՓԲ ընկերության վարչական տնօրենն էր, իսկ 2016թ. օգոստոսի 15-ից նշանակվել է նույն ընկերության գլխավոր տնօրենի 1-ին տեղակալ: Այս ընթացքում կոմբինատի գործերը <<պրավալ>> են գնացել: Իշխանական որոշ շրջանակներ վստահ են, որ նա չի կարողանալու արդարացնել հույսերը ընտրությունների մասով: Ի դեպ, Սյունիքում կատակում են՝ սյունեցիները Լիսկայից փրկվեցին, կոմբինատը՝ Հակոբյանից: Անի Սահակյան