ՌԴ նորընտիր Պետդումայում հայ պատգամավորներ չկան

Նախօրեին հայտնի դարձան Ռուսաստանի Դաշնության Պետական դումայի ընտրությունների արդյունքներով խորհրդարան անցած անձանց անունները: Սեպտեմբերի 18-ին տեղի ունեցած ընտրությունների արդյունքներով Պետդումայում կաշխատի 450 պատգամավոր, որոնցից որևէ մեկը հայ ազգի ներկայացուցիչ չէ: Նրանցից 225-ն ընտրվել են համամասնական կարգով, այսինքն՝ կուսակցությունների ցուցակներով, իսկ 225-ը՝ մեծամասնական կարգով, իրենց տեղամասերից։ Թեև ընտրություններին մասնակցող որոշ կուսակցությունների ընտրացուցակներում ազգությամբ հայեր ընդգրկված էին, բայց նրանց տեղերն անցողիկ չէին: Ի տարբերություն  նախորդ՝ 6-րդ գումարման Պետական դումայի, որտեղ կար ազգությամբ մեկ հայ պատգամավոր՝ Հովհաննես Օհանյանը, ներկայիս՝ 7-րդ, գումարման խորհրդարանում հայազգի պատգամավոր չկա: Եվ սա այն դեպքում, երբ 2010 թ-ին Ռուսաստանում անցկացված մարդահամարի տվյալներով ՌԴ-ում ազգությամբ հայ քաղաքացիների թիվը հասնում է 1 միլիոն 182 հազարի։ Ո՞րն է պատճառը, որ հայերը դուրս են մղվել Ռուսաստանի պետական կառավարման գործընթացից. հենց ռուսաստանցի քաղաքական վերլուծաբանները դժվարանում են ասել: