Նախընտրական բլեֆ, թե՞ «դուխով» կառավարություն
Նախագահ Սերժ Սարգսյանը, ներկա գտնվելով կառավարության նիստին, նախ շնորհավորել է վարչապետ Կարեն Կարապետյանի նոր ձևավորված կաբինետին, ապա ներկակացրել իր հիմնական ակնկալիքները նոր նախարարներից. «Կառավարության թիվ մեկ խնդիրը կառավարման արդյունավետության բարձրացումն է: Ե՛վ աշխարհում, և՛ մեր տարածաշրջանում, և՛ Հայաստանում մարտահրավերների պակաս չկա: Ակնհայտ է, որ շատ ավելի հեշտ է զարգանալ, շատ ավելի հեշտ է հասնել բարձր տնտեսական արդյունքների, երբ շուրջդ խաղաղ է, երբ քո հարևաններն ու գործընկեր երկրներն ունենում են տնտեսական աճ: Եվ շատ ավելի բարդ է, երբ կան արտաքին բացասական ազդակներ, բայց դու պարտավոր ես անել առավելագույնը և ունենալ զարգացում: Մեզ, իհարկե, անհրաժեշտ է շարունակել լինել մրցունակ և հետևողականորեն բարձրացնել մեր տնտեսության արդյունավետությունը: Իմ համոզումն է, և աշխարհի փորձն է այդ մասին ասում, որ հնարավոր է և պետք է ավելի լավ, ավելի ռացիոնալ կառավարել համեստ միջոցներն ու հասնել անհամեմատ ավելի լավ արդյունքների: Կարծում եմ՝ մեր հասարակությունն էլ նույն ակնկալիքներն ունի: Մեր տնտեսության, և ընդհանրապես, հասարակության ներուժն ավելի կազմակերպված և նպատակային աշխատանքի մեջ է: Սահմանադրական բարեփոխումներով մենք դե ֆակտո մեր երկրում սկսել ենք համակարգային փոփոխությունները: Այս տեսանկյունից ներկա կառավարությունը լրջագույն դերակատարություն է ստանձնում. այն է՝ դառնալ այս փոփոխությունների լոկոմոտիվը, դառնալ այս փոփոխությունների շարժիչ ուժն ու իրականացնողը: Կառավարման կիսանախագահական համակարգից անցումը խորհրդարանական կառավարման, փոխում է ոչ միայն երկրի կառավարման մոդելը, այլև առաջին հերթին հավաքական մտածողության և հավաքական վերաբերմունքի փոփոխության հարց է լուծում: Միգուցե, մարդիկ ամբողջովին չեն էլ պատկերացնում, թե ինչ մասշտաբներով է փոխելու մեր իրականությունը սահմանադրական բարեփոխումների և նոր կառավարման մոդելին անցման հանգամանքը: Ձեզ վիճակված է դառնալ այս անցումային ժամանակաշրջանի առաջնորդը, և ես հավատում եմ ձեր ուժերին, հավատում եմ, որ Հայաստանի Հանրապետության այս կառավարությունը կարող է անել այն, ինչ չի հաջողվել նախկին բոլոր կառավարություններին»,– նշել է նախագահը և ընդգծել, որ փոփոխությունների հարցում կառավարությունը միայնակ չէ, իսկ վարչապետ Կարեն Կարապետյանը լինելու է առաջնորդը: «Նոր կառավարության հաջողությամբ են պայմանավորված այն ակնկալիքները, որ ունի մեր ժողովուրդը: Պետք է լիարժեքորեն լծվել աշխատանքի: Իմ հորդորն է՝ նվիրվել անմնացորդ: Աշխատանքային հարաբերություններում շատ դժվարություններ կլինեն, բայց եղեք ամուր, հաստատակամ: Ինչպես պայմանավորվել ենք՝ նեղանալ և նեղսրտել չկա: Միշտ անձնականը պետք է մղվի երկրորդական պլան: Մենք պետք է միայն առաջ գնանք: Պռոբլեմների ժամանակ մի փորձեք դրանց արմատները տեսնել նախկինում, պետք է գտնել առաջ գնալու ուղիները» – հայտարարել է Սերժ Սարգսյանը: Եթե նախագահը խոսում է չենաղանալու և չնեղսրտելու մասին, նշանակում է՝ նա վստահ է, որ նեղացածներ կան: Թերևս, կա նաև դրա առիթը: Ընդհանւոր առմամբ Սերժ Սարգսյանի ելույթը, թերևս, լիովին տեղավորվում է նախընըտրական գործընթացի տրամբանության մեջ: Առաջին անգամ չէ, որ նա խոսում է կառավարությոն նոր դերակատարման, արդյունավետ աշխատնանքի և հասարակության ակնկալիքների և հույսերի մասին: Բայց այդ ամենի արդյունքում մենք ունեցել ենք այն, ինչ որ ունենք: Այդ ինչո՞ւ պիտի այս կառավարությունն անի այն, ինչ-որ չեն կարողացել անել նախորդ կառավարությունները: Հրապարակային ելուլթներում Սերժ Սարգսյանը նախորդ երկու վարչապետերի հետ ևս մեծ հույսեր էր կապում: Բոլորն են հիշում, թե ինչպես էր նա նույն դահլիճում նստած պահանջում ատկատների դեմն առնել ու <<բռնել գլխից>>: Սերժ Սարգսյանը խոստավանում է, որ իր հրապարակային պահանջները կառավարական կուլիսներում միշտ ջրվե՞լ են, թե՞ նախորդ նախարարները չունեին իրենց գործի կարևորության գիտակցումը: Եթե այո, ուրեմն պետք է արձանագրել, որ Սերժ Սարգսյանը տարիներ շարունակ վարել է սխալ կադրային քաղաքականություն: Որևէ փոփոխություն այսօր չի կարող վերջնական ու արժահանավատ դիտվել, որովհետև մենք և՛ Սյունիքի մարզպետ Սուրիկ Խաչատրյանի պաշտոնակությունը, և օրդիոզ կերպարների հրաժարականները նախկինում մի անգամ արդեն տեսել ենք: Կարճ ժամանակ անց տեսել ենք նաև նրանց վերադարձը: Այս իմաստով Հայաստանում որևէ փոփոխություն կամ հրաժարական վերջնական ու կայուն չի կարող ընակալվել: Միակ բանը, որը հաստատապես ակնհայտ է, դա այն է, որ Սերժ Սարգսյանը 2017 թվականի ընտրություններից առաջ հասարակության մեջ փոփոխությունների հանդեպ հավատ ու վստահություն ներշնչելու խնդիր ունի, որը և փորձում է լուծել: Բայց դա ընդամենը նախընտրական բլեֆ է, ոչ ավելին: Ընդ որում նոր կառավարությունը շատ քիչ ժամանակ ունի դրական փոփոխությունների առարկայական արդյունքներ ցույց տալու համար: Նախկին երկու վարչապետերը տարիների ընթացքում չկարողացան այդ արդյուքներն ապահովել, Կարեն Կարապետյանը մի քանի ամսում հաստատ հրաշք չի գործելու: Ի վերջո, մարդն անկեղծ հայտարարեց, որ կախարդական փայտիկ չունի: Ու չնայած նա իր կաբինետների անդամներին հորդորել է <<դուխով>> գործի անցնել, բայց հազիվ թե դրանով հարց լուծվի: Դավիթ Մանուկյան
Հետևեք մեզ Viber-ում
