«Նորից կգա լրագրողների գիրկը»

Այսօր ԱԺ ճեպազրույցների ժամանակ Վահրամ Բաղդասարյանն ասաց, որ կփորձի հաշտեցնել լրագրողներին ու Գալուստ Սահակյանին. «Խորհուրդ կտամ, որ մկրատով չկտրտեք խոսքը, որովհետեւ ցանկացած պատրաստված ելույթ, ինչքան էլ պատրաստված լինի այդ քաղաքական գործիչը, հմուտ լրագրողը կարող է ստանալ լրիվ այլ պատկեր, եթե սկսի մկրատով գործողություններ անել: Ավելի լավ է դուք ուշադիր լինեք: Գալուստ Գրիգորիչը միշտ ներող է, ինձ թվում է նորից նա կգա լրագրողների գիրկը»: Խոսելով Սյունիքի նախկին մարզպետի հրաժարականի մասին, Բաղդասարյանը նշեց, որ   վստահ է, որ Խաչատրյանը շատ հաջող մարզպետ է եղել։ Իսկ որոշումը կայացրել է վարչապետը՝ համաձայնեցնելով այն նախագահի հետ։ «Ինչու՞ է նա հեռացել։ Այդ հարցը կարող եք տալ ցանկացած նախկին նախարարի կամ մարզպետի։ Բայց անփոխարինելիներ մեզ մոտ չկան։ Պետք չէ կարծել, որ եթե Խաչատրյանին հանել են, նշանակում է պատժելու են։ Եթե հանել են, դա դեռ չի նշանակում, որ նա մեղավոր է։ Եթե մեկին պաշտոնից հանում են, ուրեմն նրան պետք է դատե՞ն։ Ինչի՞ համար։ Կարելի է քննադատել, հասկանալ, թե ինչը նրան չի հաջողվել եւ ինչու։ Բայց պատժի մասին խոսել պետք չէ»,– ասաց Բաղդասարյանը ։