Տիգրան Աբրահամյան. ադրբեջանական բանակն ակտիվացել է. «ՀԺ»

Վերջին օրերին Ադրբեջանն  ակտիվության նշաններ է ցույց տալիս Ղարաբաղի հետ շփման գծում։ Հրադադարի խախտման դեպքերի եւ արձակված կրակոցների թիվն օր օրի ավելանում է։ ԼՂՀ ՊԲ-ն երեկ տեղեկացրել էր նաեւ, որ կիրառվել են խոշոր տրամաչափի ԴՇԿ գնդացիրներ։ Հաղորդագրությունում նշվում էր, որ «հակառակորդին լռեցնելու համար ՊԲ առաջապահ զորամասերը դիմել են պատասխան գործողությունների»։ Անդրադառնալով հաղորդագրության այդ երկու դրվագին՝ ռազմական փորձագետ Տիգրան Աբրահամյանը եզրակացնում է, որ եթե ՊԲ-ն դիմել է պատասխան գործողությունների՝ նշանակում է կրակահերթերն արդեն կրում են կանոնավոր բնույթ եւ անմիջական վտանգ են ստեղծում մարտական հերթապահություն կրող անձնակազմի կամ մարտական դիրքերի ենթակառուցվածքների, դրանց սպասարկման համար։ – Պարոն Աբրահամյան, դուք ժամանակ առ ժամանակ լինում եք սահմանին։ Տարածված պաշտոնական տեղեկատվության եւ ձեր ունեցած   տեղեկությունների   վրա հիմնվելով, կարո՞ղ ենք ասել, որ իրավիճակը սահմանին արտաքուստ է միայն հանգիստ։ – Այո, էս պահին իրոք կարող ենք արձանագրել, որ խաղաղությունը միայն արտաքուստ է, որովհետև խորքային առումով նկատելի են գործընթացներ, ադրբեջանական բանակն ակտիվացել է, որը տարբեր դրսեւորումներ է ունենում սահմանագծին։ Ըստ էության, այն հարաբերական խաղաղություն ասվածը, որ շատ ժամանակ երեւում է, գոնե այս պահին արտաքուստ է։ – Իրավիճակը, ըստ ձեզ, բա՞րդ է: Հեռանկար կա՞ ավելի լարվելու։ – Այս պահին չկան շատ լուրջ իրավիճակներ, բայց ակտիվացման միտումները նկատելի են։ Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում