Ինչ հանձնարարեց վարչապետը Դավիթ Հարությունյանին

Կառավարության այսօրվա նիստում վարչապետ Կարեն Կարապետյանը հանձնարարական տվեց պետության կողմից քաղաքացիներին մատուցվող ծառայությունների ոլորտի վերաբերյալ: «Պետք է ի գիտություն ընդունել, որ պետական մարմինների կողմից մատուցվող ծառայությունների որակի և արդյունավետության բարելավման խնդիրը կառավարության համար համարվում է գերակայություն», - նշեց վարչապետը: Վարչապետը կառավարության աշխատակազմի ղեկավար-նախարար Դավիթ Հարությունյանին հանձնարարեց երկօրյա ժամկետում ձևակերպել հանձնարարականներ` նշելով կատարման պատասխանատուներին և ժամկետները: «Մենք պետք է մաքսիմալ բաց ու թափանցիկ ստեղծենք համապատասխան վայրեր ու հրապարակներ, որտեղ քաղաքացին գալիս է և կարճ ժամկետում ստանում է այն, ինչ ակնկալում էր պետական մարմիններից», - ասաց վարչապետը: Նա շեշտեց՝ կարևոր է այդ գործում վերացնել հերթերը, տեղեկանքների հետ կապված քաշքշուկները: Պետական կառավարման համակարգի պարզեցման և բյուջետային ծրագրերի ռազմավարական պլանավորման գործընթացի վերաբերյալ վարչապետ Կարապետյանը նույնպես հանձնարարականներ ուներ: Նա կառավարության անդամներին հանձնարարեց 10-օրյա ժամկետում կառավարության աշխատակազմ ներկայացնել առաջարկություններ կառավարության այն որոշումների վերաբերյալ, որոնք նպատակահարմար են ընդունել գործադիր մարմնի ղեկավարի մակարդակով: «Մենք ուզում ենք վստահության կառավարման համակարգ ստեղծել, վստահել մեր թիմի անդամներին, և մաքսիմալ ձևակերպել, թե որ որոշումներն են լիազորված ընդունելու: Ամբողջ լիազորությունները կենտրոնացնելով այստեղ՝ մենք արդյունավետ կառավարում չենք ունենա: Մենք որոշում ենք կայացնելու որոշումների ընդունման մի մասը ապակենտրոնացնել», - նշեց վարչապետը: