Ինչու հրաժարական տվեցին. Փաշինյանը մանրամասնում է

«Քաղաքացիական պայմանագիր» կուսակցության վարչության հրաժարականը արտառոց երևույթ չէ, ասաց ԱԺ պատգամավոր Նիկոլ Փաշինյանը լրագրողների հետ ճեպազրույցում։ «Եթե հայաստանյան քաղաքական իրականության համար սա արտառոց երևույթ է, ապա մեզ համար այդպես չէ։ Մեր կուսակցության համար սա նորմալ է, որովհետև երբ այդ մարդիկ վարչության անդամ էին առաջադրվում, ասում էին, որ իրենք պատրաստ են ստանձնել պատասխանատվություն։ Եթե մենք ընտրությունների մեծ մասում հաղթեինք, վարչության հրաժարականի հարց չէր առաջանա», - նշեց Ն.Փաշինյանը: Նրա խոսքով, եթե ՔՊ-ն չի հաղթել ընտրություններում և այդ ընթացքում իշխանափոխություն չի արել, ապա կուսակցությունը պետք է վերանայի իր գործողությունները, հասկանա, թե որտեղ ինչ սխալ կամ բացթողում է արել։ «Մենք պետք է որոշակի վերանայումներ անենք մեր գործողությունների մեջ։ Հասկանանք, թե որտեղ ենք հաջողել, որտեղ՝ ոչ։ Կուսակցության առաջիկա քայլերը կներկայացվեն արտահերթ համաժողովի շրջանակում», - ասաց նա։ Ն.Փաշինյանը նաև ընդգծեց, որ Հայաստանում կուսակցություններ կան, որ 1988 թվին ստեղծվել են և մինչև հիմա նույն վարչությունը շարունակում է գործել։