Ավելի քան 10 000 թաքնված հայեր են բնակվում Մուշում. BBC
BBC-ի թղթակից Լարա Պետրոսյանը, ում նախատատը Հայոց ցեղասպանությունից փրկված և արտասահմանում նոր կյանք սկսած քիչ մարդկանցից է եղել, մեկ դար անց այցելել է իր ընտանիքի` քարուքանդ եղած բնակատեղին:
«Հայերին արտաքսել և սպանել են ողջ Անատոլիայի տարածքում: Ես այցելել եմ Անատոլիայի մոտակա Մուշ քաղաքը, որտեղ 1915-ին բնակչության կեսը հայեր էին: Այսօր քաղաքը բնակեցված է մեծամասամբ քրդերով»,- իր պատրաստած ռեպորտաժում նշում է Լարան:
Horizon Weekly-ի հաղորդմամբ` թղթակիցը փորձել է պարզել` արդյոք այնտեղ բնակվող հայեր մնացել են, թե ոչ: Լարան այցելել է Մուշի նորաբաց Հայկական մշակութային կենտրոն և զրուցել կենտրոնի հիմնադիր Հայրեթին Արսլանի հետ, ում խոսքով` Մուշում «հայ ծնվելը նշանակում է ողջ կյանքդ վախի մեջ ապրել»:
«Նախապապերս սրի են հանվել Ցեղասպանության ժամանակ: Ցեղասպանությունից հետո մեր ցեղի երիտասարդ աղջիկներն ամուսնացել են ոչ հայերի հետ` հարկադրելով մուսուլմանություն ընդունել: Նրանք ստիպված են եղել մուսուլմանություն ընդունել, քանի որ Մուշում քրիստոնեությունը որպես դավանանք գոյություն չունի: Այս կենտրոնը բացելուց հետո շատերը գալիս են և ասում. «Տատիկը հայ է եղել»: Այժմ գիտենք, որ հայերի մոտ 10-15 000 ժառանգներ են բնակվում այս շրջանում», - ասել է Մուշի Հայկական կենտրոնի հիմնադիրը:
Հետևեք մեզ Viber-ում
