«Իսկանդերի» պատասխանը. միասին հրթիռներ են արտադրելու

Ադրբեջանը հրապարակել է 2017 թվականի իր պաշտպանական ծախսերը: Ադրբեջանական APA լրատվական գործակալության փոխանցմամբ՝ 2017 թվականին Ադրբեջանը պաշտպանական ոլորտին կհատկացնի մոտ 1 միլիարդ դոլար: 2017 թվականի համար նախատեսված պետբյուջեի փաթեթում առաջարկվում է պաշտպանական ոլորտին հատկացնել 1.615.359.858 մանաթ (1 դոլարը համարժեք է 1.64 մանաթի): Minval.az-ն իր հերթին հայտնել է, որ 2017 թվականի պետբյուջեով Ադրբեջանի պաշտպանության ու ազգային անվտանգության ապահովման ծախսերի համար հատկացվելու է 2.9 միլիարդ մանաթ, ինչը 6.9 տոկոսով (187 միլիոն մանաթով) գերազանցում է 2016 թվականի ցուցանիշը: Ավելի վաղ հաղորդվել էր, որ 2017 թվականի համար Ադրբեջանի պետբյուջեի հիմքում դրվել է մեկ բարել նավթի համար 40 դոլարի հաշվարկը: Չնայած նավթի գների անկման հետևանքով ֆինանսական բարդություններին` փաստորեն, Ալիևը շարունակում է մեծ ուշադրություն հատկացնել պաշտպանական ոլորտին: Ավելին, սեպտեմբերի 21-ին Երևանում ռազմական զորահանդեսին ցուցադրված զինտեխնիկան, դեռ ինչպես երևում է, խորը նստվածք է թողելու Ադրբեջանի իշխանությունների գործելաոճում: Նրանք շարունակելու են մեծ քանակությամբ զենքի մատակարարումների վերաբերյալ նորանոր պայմանագրեր կնքել տարբեր պետությունների հետ և վստահաբար կարելի է ասել, որ Մոսկվայի հետ բանակցություններն այդ թվում են: Արդեն իսկ ուշագրավ տեղեկություններ են ի հայտ գալիս... Բաքուն ու Մոսկվան համատեղ կարտադրեն նոր սերնդի մարտավարական հրթիռներ: Պարզվում է, որ Ռուսաստանն ու Ադրբեջանը ստորագրել են նոր սերնդի մարտավարական հրթիռների համատեղ արտադրության մասին հուշագիր՝ հայտնում է Azeri Defence ռազմական պարբերականը: Փաստաթուղթը ստորագրել են Ադրբեջանի պաշտպանական արդյունաբերության նախարարության «Շարգ» արտադրական միավորման ու Ռուսաստանի «Մարտավարական հրթիռային սպառազինություն» կորպորացիայի ներկայացուցիչները: Հուշագիրը ստորագրվել է Բաքվում ընթացող ADEX 2016 միջազգային երկրորդ ռազմական ցուցահանդեսի շրջանակներում: Կողմերը մտադիր են համատեղ արտադրել «օդ-օդ» և «օդ-երկիր» դասի նոր սերնդի մարտավարական հրթիռներ: Սա կարելի է համարել Ռուսաստանի և Ադրբեջանի իշխանությունների համատեղ պատասխանը` «Իսկանդերի» և զինատեսակների ցուցադրմանը` Երևանում սեպտեմբերի 21-ին: Մետաքսյա Շալունց