«Անգրագետը դուք եք, այս սուպեր գրագետ». Վիճաբանություն ԱԺ-ում

ԱԺ Պետաիրավական հարցերի մշտական հարցերի հանձնաժողովում այսօր վիճաբանություն տեղի ունեցավ «Ժառանգության» պատգամավոր Զարուհի Փոստանջյանի և ՀԱԿ պատգամավոր Գագիկ Ջհանգիրյանի միջև: Երբ  Փոստանջյանը ներկայացրեց նախագիծը, Գագիկ Ջհանգիրյանը արձագանքեց. «Ես այս գաղափարին կողմ եմ, Օրինակ՝ նախաքննությունը թափանցիկ չի կարող լինել, այն գաղտնի է: Թափանցիկ կարող է լինել շրջազգեստը, նույնիսկ ընտրությունները»: Զարուհի Փոստանջյանն ի պատասխան հայտարարեց. «Դուք ձեր դիտողությունները կարող էիք ավելացնել նախագծում, ու կխնդրեի հիմա իրավական գնահատականներ չտալ»: Այնուհետև Զարուհի Փոստանջյանը նշեց, որ կան բազմաթիվ նախագծեր, որոնք բացիողի են մատնվել: Անդրադառնալով Հովհաննես Սահակյանի այն դիտողությանը, թե նրա նախագիծը դարակներում թողնված, փոշիների մեջ ընկած փաստաթուղթ է, ասաց. «Փոշին, որ դրվել է, դա ձեր տեղեկանքի վրա է դրվել, քանի որ տասնյակ տարիների է, քանի որ քննության առարկա չեն դարձել նշված գործերը, դրանց թվին է պատկանում նաեւ Ջհանգիրյանի օրոք տեղի ունեցած քրեական գործը, որը գնաց, պտտվեց դատարաններում ու այդ գործի վերաբերյալ Եվրադատարանը որոշում կայացրեց՝ ՀՀ-ին հիսուն հազար եվրո տուգանել»: Արձագանքելով՝ Գագիկ Ջհանգիրյանը հայտարարեց. «Մենք ԱԺ նոր կանոնակարգի վրա ենք հիմա աշխատում, ես կոչ կանեմ որ այսուհետ, երբ պատգամավորը հերթագրվի հարց տալու համար, նախ հոգեկան հավասարակշռության մասին տեղեկանք ներկայացնի»: «Անգրագետը դուք եք, եթե անգրագիտության մասին եք խոսում: Այս սուպեր գրագետ, հոգեպես հավասարակշիռ մարդկանց շնորհիվ մեր պետությունը հիսուն հազար եվրոյով տուժել է»,- բարկացած ասաց Զարուհի Փոստանջյանը: