Քուրդ քաղաքական գործչին սպառնում է 18 տարվա ազատազրկում

Dünya Bülteni լրատվական կենտրոնի փոխանցմամբ՝ Թուրքիայում դատական գործընթաց է սկսվել Մարդինի քաղաքապետ Ահմեթ Թուրքի դեմ։ Նրան սպառնում է 7.5-18 տարվա ազատազրկում։ Ահմեթ Թուրքը մեղադրվում է «ահաբեկչական զինված կազմակերպության անդամ հանդիսանալու», «ահաբեկչական զինված կազմակերպության օգտին քարոզչություն կատարելու» համար։ Այդ մասին նշված է Դիարբեքիրի հանրապետական դատախազության պատրաստած 44-էջանոց մեղադրականում, որն ուղարկվել է ծանր հանցանքները քննող 4-րդ դատարան։ Հիշեցնենք, որ Ահմեթ Թուրքը 2000-2009 թվականներին հանդիսացել է քրդական «Դեմոկրատական հասարակարգ» կուսակցության նախագահ (ընդհուպ մինչև թուրքական դատարանի որոշմամբ կուսակցության փակում)։ Բացի այդ, նա նախկինում 6 անգամ Մարդինից ընտրվել է որպես պատգամավոր՝ 1973, 1977, 1987, 1991, 2007, 2011 թվականներին։ Ի դեպ, կարծիքներ կան, որ Ահմեթ Թուրքի պապը եղել է հայ, ով 1925 թվականին փոխել է անունն ու ազգանունը հալածանքներից խուսափելու համար: